راولپنڈی کو ڈینگی کے تیزی سے بڑھتے ہوئے بحران کا سامنا ہے ، ترجمان ڈی ایچ اے ڈاکٹر وقار احمد

اتوار 31 اگست 2025 18:10

راولپنڈی (اُردو پوائنٹ اخبارتازہ ترین - اے پی پی۔ 31 اگست2025ء) ڈسٹرکٹ ہیلتھ اتھارٹی (ڈی ایچ اے) کے ترجمان ڈاکٹر وقار احمد نے کہا ہے کہ راولپنڈی کو ڈینگی کے تیزی سے بڑھتے ہوئے بحران کا سامنا ہے ، ڈی ایچ اے نے گزشتہ 24 گھنٹوں کے دوران 11 نئے کیسز کے ساتھ 133 کیسز کی تصدیق کی ہے۔ہفتہ کو انہوں نے ’’اے پی پی ‘‘ کو بتایا کہ اگست کے آخری ہفتے کے دوران ڈیزیز ڈیٹیکشن اینڈ سرویلنس رپورٹنگ یونٹ (ڈی ڈی ایس آر یو) کی جانب سے کیے گئے نگرانی کے اعداد و شمار کا تجزیہ مختلف علاقوں میں صحت عامہ کے لیے ایک فعال خطرہ کو ظاہر کرتا ہے، کیسز میں تیزی سے اضافے نے حکام کو ڈینگی کے وسیع پیمانے پر پھیلاؤ کو روکنے کے لیے مضبوط اقدامات پر عمل درآمد کرنے پر زور دیا ہے۔

ڈاکٹر وقار نے کہا کہ یہ اہم اعداد و شمار شدید لاروا کے انفیکشن کو نمایاں کرتا ہے، خاص طور پر پوٹھوہار ٹاؤن کی یونین کونسلوں میں جہاں ہر سروے شدہ مقام خطرے کی سطح سے زیادہ ہے انہوں نے مکینوں پر زور دیا کہ وہ مچھروں کی افزائش کو روکنے کے لیے کنٹینرز، نالوں اور کباڑ خانوں میں کھڑے پانی کو ختم کریں۔

(جاری ہے)

ایم ایس ڈی ایچ کیو ہسپتال ڈاکٹر اکرام نیازی نے ’’اے پی پی ‘‘ کو بتایا کہ ایک جامع ہنگامی منصوبہ تیار کیا گیا ہے جو ضرورت کے مطابق عملدرآمد کے لیے تیار ہے۔

انہوں نے کہا کہ ضلعی انتظامیہ کڑی نگرانی کر رہی ہے، سرویلنس اپ ڈیٹس کی نگرانی اور محکمہ صحت کی کارکردگی کا جائزہ لینے کے لیے روزانہ اجلاس منعقد کر رہی ہے، ان کوششوں کا مقصد صورتحال کو کنٹرول میں رکھنا ہے، حکام کے ساتھ وسائل کو مربوط کرنا اور احتیاطی تدابیر کو نافذ کرنا ہے۔