Live Updates

سیکرٹری زراعت سندھ کا ڈی جی ایگریکلچر ایکسٹینشن کے دفتر کا دورہ

اتوار 31 اگست 2025 18:10

حیدرآباد (اُردو پوائنٹ اخبارتازہ ترین - اے پی پی۔ 31 اگست2025ء) سیکرٹری زراعت سندھ محمد زمان ناریجو نے آج ڈائریکٹر جنرل ایگریکلچر ایکسٹینشن کے دفتر کا دورہ کیا اور سندھ میں ممکنہ سیلابی صورتحال کے حوالے سےاجلاس کی صدارت کی۔ اجلاس میں محکمہ کی جانب سے "کنٹی جنسی پلان 2025 برائے فلڈ اور رین ایمرجنسی" پیش کیا گیا۔ ڈی جی ایگریکلچر ایکسٹینشن منور احمد جمانی نے اجلاس میں منصوبہ پیش کرتے ہوئے بتایا کہ اس کا بنیادی مقصد ضلعی انتظامیہ کے ساتھ اشتراک کے ذریعے سندھ کے ہاریوں، فصلوں اور دیہی آبادی کو سیلاب اور بارشوں کی ہنگامی صورتحال میں تحفظ فراہم کرنا ہے۔

منصوبے میں متعدد اقدامات شامل ہیں جن میں ہر ضلع میں زرعی عملے اور ٹیکنیکل ٹیموں کی تعیناتی، اسپرے پمپ اور زرعی ادویات کی فراہمی، مال مویشیوں کے لیے چارہ اور ویکسینیشن سہولیات، ایمرجنسی ہیلپ ڈیسک کا قیام اور آگاہی مہم شامل ہیں۔

(جاری ہے)

اس کے علاوہ ہر ضلع میں فوکل پرسن مقرر کر دیے گئے ہیں اور کسانوں کی فوری رہنمائی کے لیے ایمرجنسی نمبرز بھی جاری کئے گئے ہیں۔

سیکرٹری زراعت نے اجلاس سے خطاب کرتے ہوئے کہا کہ کاشتکاروں کے ساتھ بروقت رابطہ اور تکنیکی رہنمائی نہایت ضروری ہے تاکہ انہیں فصلوں اور مال مویشیوں کے تحفظ کے لیے درست معلومات فراہم کی جا سکیں۔ انہوں نے افسران کو ہدایت کی کہ وہ اپنی ذمہ داریاں پوری چوکسی کے ساتھ انجام دیں اور متاثرہ علاقوں میں کسانوں کو زیادہ سے زیادہ سہولتیں فراہم کریں۔ اجلاس کے اختتام پر یہ عزم کیا گیا کہ ہاریوں اور دیہی آبادی کے تحفظ کے لیے پیشگی منصوبہ بندی، عملی تیاری اور فوری عملدرآمد کو یقینی بنایا جائے گا۔ مزید معلومات اور کسانوں کی مدد کے لیے ایگریکلچر ایکسٹینشن ڈپارٹمنٹ کا ایمرجنسی ہیلپ لائن نمبر 0311-1646111 جاری کیا گیا ہے۔