Live Updates

سیلاب میں جہیزبہہ جانے والی 9 لڑکیوں کی شادی کی ذمہ داری گورنرنے لی

بدھ 3 ستمبر 2025 22:39

لاہور(اُردو پوائنٹ اخبارتازہ ترین - آن لائن۔ 03 ستمبر2025ء) سیلابی صورتحال میں جہیز بہہ جانے والی 9 لڑکیوں کی شادی کی ذمہ داری گورنر پنجاب سلیم حیدر خان نے خود سنبھال لی۔سوشل میڈیا پر متاثرہ فیملی کے حالات منظر عام پر آنے کے بعد گورنر پنجاب نے موہلنوال میں فیملی کا دورہ کیا اور سیلاب سے متاثرہ شہریوں سے ملاقات کی۔ متاثرہ افراد نے پانی میں ڈوبے ہوئے اپنے گھر دکھائے اور مشکلات سے آگاہ کیا۔

اس موقع پر گورنر پنجاب نے کہا کہ شدید بارشوں اور سیلاب نے پنجاب میں تباہی مچادی ہے، لوگوں کے گھر اور قیمتی سامان پانی میں بہہ گیا، اور شہری پناہ لینے پر مجبور ہیں۔ انہوں نے کہا کہ میری تمام توانائیاں سیلاب زدگان کی بحالی پر مرکوز ہیں۔سلیم حیدر خان نے اعلان کیا کہ روزانہ کی بنیاد پر سیلاب متاثرہ خاندانوں کو تین وقت کا کھانا فراہم کیا جائے گا، جبکہ ریڈ کریسنٹ کی جانب سے میڈیکل کیمپس بھی قائم کیے جائیں گے۔

(جاری ہے)

متاثرین کے لیے خیمے بھی فراہم کیے جائیں گے۔گورنر نے زور دیا کہ دکھ کی اس گھڑی میں ہر ممکن مدد فراہم کی جائے گی اور یہ وقت سیاست کا نہیں، بلکہ انسانیت کی خدمت کا ہے۔ سیلاب متاثرین نے گورنر سے شکوہ کیا کہ اب تک کسی قسم کی سرکاری مدد، رہائشی خیمے یا طبی سہولیات نہیں دی گئیں اور انہوں نے اپنی مدد آپ کے تحت اپنی جانیں بچائی ہیں۔