عید میلادالنبیؐ کے انتظامات کے حوالے سے اجلاس

منگل 2 ستمبر 2025 17:35

راولپنڈی (اُردو پوائنٹ اخبارتازہ ترین - اے پی پی۔ 02 ستمبر2025ء) ڈپٹی کمشنر راولپنڈی ڈاکٹر حسن وقار چیمہ کی زیر صدارت عید میلادالنبی ﷺ کے انتظامات کے حوالے سے ایک اہم اجلاس منعقد ہوا۔ اس موقع پر ڈی ایس پی سیکیورٹی، سی ٹی ڈی، سیف سٹی، ٹریفک پولیس، میونسپل کارپوریشن، واسا، آر ڈبلیو ایم سی، ریسکیو 1122 اور دیگر متعلقہ محکموں کے افسران بھی موجود تھے۔

ڈپٹی کمشنر نے ہدایت کی کہ تمام محکمے طے شدہ ایس او پیز کے مطابق تیاریوں کو مکمل کریں اور کل تک اپنے سرٹیفیکیٹس جمع کروائیں۔ انہوں نے محکمہ صحت کو خصوصی طور پر ہدایت کی کہ تمام ہسپتالوں میں انتظامات کو حتمی شکل دی جائے اور کمیٹی چوک، بنی چوک، فوارہ چوک، پل نذر شاہ اور دیگر اہم مقامات پر میڈیکل کیمپس قائم کیے جائیں۔

(جاری ہے)

ڈاکٹر حسن وقار چیمہ نے کہا کہ جلوسوں کی فول پروف سیکیورٹی کو یقینی بنایا جائے۔

اس مقصد کے لیے سیف سٹی کیمروں کی تنصیب کے ساتھ ساتھ ڈرونز کے ذریعے بھی مانیٹرنگ کی جائے گی جبکہ کنٹرول روم کے ذریعے صورتِ حال پر مسلسل نظر رکھی جائے گی۔ انہوں نے واضح کیا کہ کھانے پینے کی اشیاء فروخت کرنے والے تمام اسٹالز کو محکمہ صحت کا سرٹیفیکیٹ حاصل کرنا لازمی ہوگا اور حکومت پنجاب کی ہدایت کے مطابق مٹھائی کی دکانوں کو بھی ہیلتھ سرٹیفیکیٹ فراہم کرنا ہوگا۔

ڈپٹی کمشنر نے ٹریفک پولیس کو ہدایت کی کہ ٹریفک روٹس اور پارکنگ کے حوالے سے روٹ پلان فوری طور پر تیار کرکے جاری کیا جائے تاکہ شہریوں کو آمدورفت میں کسی قسم کی دشواری کا سامنا نہ ہو۔مزید برآں ڈپٹی کمشنر نے آر ڈبلیو ایم سی کو احکامات جاری کیے کہ جلوس کے تمام روٹس کو دھو کر صاف کیا جائے اور جلوس کے شرکاء پر عرقِ گلاب کے چھڑکاؤ کے انتظامات بھی مکمل کیے جائیں۔اجلاس کے دوران تمام تحصیلوں کے اسسٹنٹ کمشنرز نے اپنے اپنے علاقوں میں انتظامات کے بارے میں بریفنگ دی۔ ڈپٹی کمشنر نے انتظامات کو مزید مؤثر بنانے کے لیے احکامات جاری کیے اور تمام محکموں کو ذمہ داریوں کی بروقت تکمیل کی ہدایت کی۔

Facebook Twitter Google + Share on Whatsapp

عید میلادالنبیؐ کے انتظامات کے حوالے سے اجلاس

متعلقہ عنوان :

مزید قومی خبریں