چیئرمین میٹرک بورڈ کے بیک وقت 2 سرکاری عہدے رکھنے پر فریقین سے جواب طلب

غلام حسین سوہو فیڈرل ڈائریکٹوریٹ ایجوکیشن میں تعینات تھے پھر 3 سال کے لیے چیئرمین میٹرک بورڈ تعینات کیا گیا

بدھ 3 ستمبر 2025 12:15

کراچی(اُردو پوائنٹ اخبارتازہ ترین - این این آئی۔ 03 ستمبر2025ء)سندھ ہائی کورٹ نے چیئرمین میٹرک بورڈ غلام حسین سوہو کے خلاف بیک وقت 2 سرکاری عہدے رکھنے کے کیس میں فریقین سے جواب طلب کر لیا۔عدالت میں چیئرمین میٹرک بورڈ غلام حسین سوہو کے خلاف بیک وقت 2 سرکاری عہدے رکھنے کے کیس کی سماعت ہوئی۔درخواست گزار کے وکیل نے عدالت کو بتایا کہ غلام حسین سوہو فیڈرل ڈائریکٹوریٹ آف ایجوکیشن میں تعینات تھے پھر غلام حسین سوہو کو 3 سال کے لیے چیئرمین میٹرک بورڈ تعینات کیا گیا۔

درخواست گزار کے وکیل نے عدالت کو مزید بتایا کہ غلام حسین سوہو نے ایف ڈی ای میں ریٹائرمنٹ کی درخواست دے کر فوری چیئرمین کا عہدہ سنبھالا، نیاعہدہ سنبھالنی کے لیے ریٹائرمنٹ کی درخواست کی منظوری کا انتظار بھی نہیں کیا۔

(جاری ہے)

درخواست گزار کے وکیل نے عدالت کو یہ بھی بتایا کہ اسٹبلشمنٹ ڈویژن نے غلام حسین سوہو کو تاحال ریلیف آرڈر جاری نہیں کیا، چیئرمین میٹرک بورڈ نے 2 ماہ تک بیک وقت 2 اداروں سیتنخواہیں وصول کیں۔

درخواست میں استدعا کی گئی کہ چیئرمین میٹرک بورڈ کی تقرری کو خلاف ضابطہ قرار دے کر معاملیکی شفاف انکوائری کا حکم دیا جائے اور چیئرمین میٹرک بورڈ کی تقرری کے نوٹیفکیشن کو درخواست پر فیصلہ ہونے تک معطل کیاجائے۔عدالت نے اپنے ریمارکس دیتے ہوئے کہا کہ بیک وقت وفاقی اور صوبائی حکومت میں عہدہ رکھنے کا تنازع غور طلب ہے۔عدالت نے کہا کہ وفاقی اور صوبائی حکومت کے وکلاء تفصیلی جواب کے ہمراہ عدالت میں پیش ہوں۔عدالت نے فریقین کونوٹس جاری کرتے ہوئے 10 ستمبر تک جواب طلب کرلیا۔