اسرائیل غزہ میں قحط سے ہونے والی تباہی کو روکے، ورلڈ ہیلتھ آرگنائزیشن

غزہ کی پٹی میں کم از کم 370 افراد بھوک کی وجہ سے موت کے منہ میں جا چکے ہیں،رپورٹ

اتوار 7 ستمبر 2025 17:25

جنیوا(اُردو پوائنٹ اخبارتازہ ترین - این این آئی۔ 07 ستمبر2025ء)ورلڈ ہیلتھ آرگنائزیشن (ڈبلیو ایچ او)کے ڈائریکٹر نے غزہ میں جاری قحط کے بارے میں خبردار کیا اوراسرائیل سے اس تباہی کو روکنے کا مطالبہ کردیا۔ ڈبلیو ایچ او نے نشاندہی کی کہ تنازع کے آغاز سے اب تک غزہ کی پٹی میں کم از کم 370 افراد بھوک کی وجہ سے موت کے منہ میں جا چکے ہیں۔

(جاری ہے)

جنیوا میں تنظیم کے صدر دفتر میں ایک پریس کانفرنس کے دوران ٹیڈروس ایڈہانوم گیبریسس نے کہا کہ یہ ایک ایسی تباہی ہے جسے اسرائیل روک سکتا تھا اور وہ کسی بھی لمحے اسے روک سکتا ہے۔

ورلڈ ہیلتھ آرگنائزیشن کے ڈائریکٹر نے یاد دلایا کہ اقوام متحدہ نے 22 اگست کو اعلان کیا تھا کہ غزہ کی پٹی کے کچھ علاقوں میں قحط کی صورتحال ہے۔ اسرائیل نے قحط سے انکار کرتے ہوئے حماس پر امداد لوٹنے کا الزام لگایا تھا۔ گیبریسس نے مزید کہا کہ اکتوبر 2023 میں تنازع کے آغاز سے غزہ میں کم از کم 370 افراد غذائی قلت کی وجہ سے موت کے منہ میں جا چکے ہیں جن میں سے 300 سے زیادہ فلسطینی گزشتہ دو مہینوں میں مر گئے ہیں۔