پنجاب پولیس کا لاہور سمیت صوبہ بھر میں اینٹی کائٹ فلائنگ ایکٹ کی خلاف ورزی پرکریک ڈائون جاری

اتوار 7 ستمبر 2025 19:00

لاہور (اُردو پوائنٹ اخبارتازہ ترین - اے پی پی۔ 07 ستمبر2025ء) آئی جی پنجاب ڈاکٹر عثمان انور کی ہدایت پر پنجاب پولیس کا لاہور سمیت صوبہ بھر میں اینٹی کائٹ فلائنگ ایکٹ کی خلاف ورزی پر زیرو ٹالرنس کریک ڈائون جاری ہے۔ ترجمان پولیس کے مطابق رواں سال لاہور سمیت صوبہ بھر میں انسداد پتنگ بازی ایکٹ کی خلاف ورزی پر 5208 ملزمان گرفتار،5100 مقدمات درج ،05 لاکھ 8 ہزار سے زائد پتنگیں اور19 ہزار 795 ڈور چرخیاں برآمد کرکے 4734 کیسز کے چالان جمع کروائے گئے۔

(جاری ہے)

انہوں نے بتایا کہ صوبائی دارالحکومت میں 1439 ملزمان گرفتار، 1407 مقدمات درج، 31157 پتنگیں اور1641 ڈور چرخیاں برآمد کی گئیں ۔آئی جی پنجاب کا کہنا تھا کہ پتنگ بازی ممانعت ترمیمی بل کے قانون پر سختی سے عملدرآمد یقینی بنائیں، آر پی اوز، سی پی اوز، ڈی پی اوز پتنگ بازوں، پتنگ فروشوں اور مینوفیکچررز کے خلاف کریک ڈائون میں تیزی لائیں۔انہوں نے کہا کہ جان لیوا سرگرمی کی ہرگز اجازت نہیں، خونی دھندے میں ملوث افراد کے خلاف زیرو ٹالرنس اپنائیں، دھاتی ڈور اور پتنگوں کے آن لائن کاروبار میں ملوث عناصر کو بھی قانون کی گرفت میں لایا جائے،والدین اپنے بچوں کو اس خونی کھیل سے دور رکھیں اور شہری کسی بھی مقام پر پتنگ بازی کی صورت میں 15 پر اطلاع دے کر ذمہ داری کا ثبوت دیں۔