26 نومبر احتجاج‘ بشریٰ بی بی اور عمر ایوب سمیت پی ٹی آئی رہنماؤں کی ضمانت میں توسیع

پیر 8 ستمبر 2025 13:15

اسلام آباد(اُردو پوائنٹ اخبارتازہ ترین - این این آئی۔ 08 ستمبر2025ء) انسداد دہشت گردی عدالت نے 26 نومبر احتجاج کیس میں بانی پی ٹی آئی کی اہلیہ بشریٰ بی بی اور عمر ایوب سمیت پی ٹی آئی کے دیگر رہنماؤں کی ضمانت میں توسیع کر دی۔اے ٹی سی اسلام آباد کے جج ابوالحسنات محمد ذوالقرنین نے پی ٹی آئی رہنماؤں کے خلاف 26 نومبر احتجاج، سپریم کورٹ کے باہر مظاہرے ودیگر کیسز کی سماعت کی، شیر افضل مروت، سابق وزیراعظم آزاد کشمیر عبدالقیوم نیازی سمیت دیگر رہنما پیش ہوئے۔

(جاری ہے)

عدالت نے بشریٰ بی بی، عمر ایوب سمیت دیگر کی ضمانت قبل از گرفتاری میں توسیع کر دی اور متعلقہ مقدمات میں پولیس کو 13 نومبر تک گرفتاری سے روک دیا۔عدالت میں عمر ایوب، زرتاج گل و دیگر کی حاضری سے استثنا کی درخواستیں دائر کی گئی جسے عدالت نے منظور کر لیا۔واضح رہے کہ پی ٹی آئی رہنماؤں کی مجموعی طور پر 240 سے زائد ضمانتیں زیر سماعت تھیں، عدالت نے اگلی سماعت پر فریقین کو دلائل دینے کی ہدایت کی ہے، پی ٹی آئی رہنماؤں کے خلاف تھانہ رمنا، سنگجانی،ترنول و دیگر میں مقدمات درج ہیں۔