پنجاب بھرمیں1446ٹریفک حادثات میں09افراد جاں بحق1748زخمی ہوئے

اتوار 7 ستمبر 2025 19:40

لاہور(اُردو پوائنٹ اخبارتازہ ترین - این این آئی۔ 07 ستمبر2025ء)ایمرجنسی سروسزڈیپارٹمنٹ نے گز شتہ 24گھنٹوں کے دوران پنجاب بھر میں1446ٹریفک حادثات پر ریسپانڈ کیا جن میں798افراد شدید زخمی ہوگئے جنہیں فوری طور پر نزدیکی ضلعی و تحصیل کے ہسپتالوں میں منتقل کیا گیا۔950معمولی زخمی لوگوں کو ریسکیومیڈیکل ٹیموں کے جائے حادثہ پر بروقت طبی امداد فراہم کرنے کی وجہ سے ہسپتالوں پر بوجھ بھی کم ہوا۔

ان حادثات میں زیادہ تر تعداد (77فیصد)موٹر سائیکلز حادثات کی ہے اس لیے وقت کی ضرورت ہے کہ روڈ ٹریفک حادثات کی بڑھتی ہوئی شرح کو کم کرنے کے لیے ٹریفک قوانین پر سختی سے عمل کرتے ہوئے لائن اور لین کے نظم و ضبط کا خیال رکھیں۔ ایمرجنسی ا عداد و شمار کے مطابق ریسکیو 1122کے صوبائی مانیٹرنگ سیل کو موصول ہونے والی ایمرجنسی کالز کے مطابق ان ٹریفک حادثات میں895ڈرائیوز،61کم عمرڈرائیور،671مسافراور191پیدل چلنے والے افراد متاثر ہوئے۔

(جاری ہے)

اعدادو شمار سے ظاہر ہوتا ہے کہ275ٹریفک حادثات کی فون کالز لاہور کنٹر ول روم میں موصول ہوئیں جس میں صوبائی درالحکومت352متاثرین کے ساتھ پہلے فیصل آباد121حادثات میں143متاثرین کے ساتھ دوسر ے ،گوجرانوالہ 94حادثات میں107متاثرین کے سا تھ تیسرے نمبرپررہا۔ واضح رہے کہ ان ٹریفک حادثات کے کل1757متاثرین میں1383مرد اور374خواتین شامل ہیں جبکہ زخمی ہونیوالوں میں467فراد کی اوسط عمر18سال سے کم866افراد کی اوسط عمر 18سے 40سال کے درمیان جبکہ424زخمی افراد کی اوسط عمر 40سال سے زائد ہے۔ان ٹریفک حادثات کے بیشتر واقعات میں1410موٹرسائیکلز،88آٹورکشے،151کاریں،30وین،05مسافر بسیں،25ٹرک اور166دوسری اقسام کی گاڑیاں شامل ہیں۔