کانگو میں ایبولا اور اس سے ہونے والی ہلاکتوں کی تصدیق

اسلام آباد (اُردو پوائنٹ ۔ UN اردو۔ 08 ستمبر 2025ء) جمہوریہ کانگو میں ایبولا وائرس کی وبا پھیلنے کی تصدیق ہو گئی ہے جہاں اب تک اس مرض کے 28 مشتبہ مریض سامنے آئے ہیں اور چار طبی کارکنوں سمیت 15 اموات کی اطلاع ہے۔

حکام کے مطابق، ایبولا کی وبا ملک کے جنوبی وسطی صوبے کاسائی میں پھیلی ہے جہاں بولاپے اور میکا نامی علاقے اس کا مرکز ہیں۔ مشتبہ مریضوں میں اس بیماری کی شدید علامات ظاہر ہو رہی ہیں جن میں سخت بخار، قے، اسہال اور جسم سے خون بہنا شامل ہیں۔

دارالحکومت کنشاسا میں 3 ستمبر کو حیاتیاتی طبی تحقیق کے قومی ادارے میں اس بیماری سے متاثرہ افراد کے طبی نمونوں کی جانچ سے تصدیق ہو گئی ہے کہ ملک میں وائرس کی ایبولا زائرے لڑی اس وبا کی وجہ بنی ہے۔

(جاری ہے)

وبا کو روکنے کی کوششیں

کاسائی کے متاثرہ علاقوں میں وباؤں، انفیکشن اور ان کی روک تھام کے ماہرین پر مشتمل عالمی ادارہ صحت (ڈبلیو ایچ او) کی ٹیم مقامی طبی حکام کو وبا کا پھیلاؤ روکنے میں مدد دے رہی ہے۔ لوگوں کو اس بیماری کے خلاف بچاؤ کی تدابیر سے آگاہی دینے کے لیے اطلاعاتی ماہرین بھی تعینات کیے گئے ہیں۔

'ڈبلیو ایچ او' ذاتی حفاظتی سازوسامان، متحرک لیبارٹری میں استعمال ہونے والے آلات اور دیگر اشیا پر مشتمل دو ٹن طبی سازوسامان بھی متاثرہ علاقوں میں بھیج رہا ہے۔

افریقہ کے لیے 'ڈبلیو ایچ او' کے ریجنل ڈائریکٹر ڈاکٹر محمد جنابی نے کہا ہے کہ ادارہ وائرس کا پھیلاؤ فوری طور پر روکنے اور لوگوں کو تحفظ دینے کے لیے پرعزم طور سے کام کر رہا ہے۔ وائرس سے پھیلنے والی بیماریوں پر قابو پانے کے لیے ملک میں طویل عرصہ سے موجود مہارت کو مدنظر رکھتے ہوئے طبی حکام کے ساتھ مل کر اس وبا کا خاتمہ کرنے لیے تمام ضروری اقدامات اٹھائے جا رہے ہیں۔

مریضوں میں اضافے کا خدشہ

طبی ماہرین نے خدشہ ظاہر کیا ہے کہ آئندہ ایام میں ایبولا سے متاثرہ افراد کی تعداد میں اضافہ ہو سکتا ہے۔ ملک میں اس بیماری کے علاج کا سامان بڑی مقدار میں موجود ہے جبکہ ایبولا ویکسین کی 2,000 خوراکیں بھی دارالحکومت کنشاسا میں محفوظ رکھی ہیں جنہیں جلد از جلد کاسائی منتقل کر کے ابتداً طبی کارکنوں کو تحفظ مہیا کیا جائے گا۔

اس سے پہلے جمہوریہ کانگو میں ایبولا کی وبا اپریل 2022 میں شمال مغربی ایکویٹیئر صوبے میں پھیلی تھی۔ اس وبا پر تین ماہ سے کم عرصے میں قابو پا لیا گیا جس میں طبی حکام کی مستحکم کوششوں کا اہم کردار تھا۔

کاسائی میں اس سے پہلے 2007 اور 2008 میں ایبولا وائرس کی وباؤں کے بارے میں بتایا گیا تھا جبکہ 1976 میں بیماری کی نشاندہی ہونے کے بعد اب تک ملک میں اس کی 15 وبائیں پھیل چکی ہیں۔