17 ستمبر کو عوام کو درپیش مسائل کے حوالے سے احتجاجی ریلی نکالی جائے گی، پشتونخوا نیشنل عوامی پارٹی

ژ*کوئٹہ (اُردو پوائنٹ اخبارتازہ ترین - آن لائن۔ 09 ستمبر2025ء) پشتونخوا نیشنل عوامی پارٹی کے صوبائی سیکرٹریٹ سے جاری کردہ بیان میں کہا گیا ہے کہ پارٹی کے زیر اہتمام 17 ستمبر 2025 بروز بدھ، سہ پہر 3 بجے، کوئٹہ میں پارٹی کے مرکزی سیکرٹریٹ سے ایک عظیم الشان احتجاجی ریلی نکالی جائے گی۔ اس مظاہرے کا مقصد صوبے ، خصوصا کوئٹہ شہر اور اس کے گرد و نواح میں عوام کو درپیش مختلف سنگین مسائل کی طرف حکومت اور انتظامیہ کی توجہ مبذول کرانا ہے۔

بیان میں کہا گیا ہے کہ اس وقت صوبے کے عوام شدید مشکلات سے دوچار ہیں۔ کوئٹہ سمیت مختلف علاقوں میں بجلی کی غیر اعلانیہ اور طویل لوڈشیڈنگ نے عوام کی زندگی اجیرن بنا دی ہے۔ نہ صرف بجلی بلکہ گیس کی ناروا بندش نے گھریلو صارفین اور کاروباری طبقے کو سخت پریشانی میں مبتلا کر دیا ہے۔

(جاری ہے)

سردیوں کی آمد سے قبل ہی گیس کی عدم دستیابی ناقابلِ برداشت ہے۔

علاوہ ازیں، شہر میں موٹر سائیکل سوار نوجوانوں کو بلا جواز اور غیر قانونی طور پر گرفتار کیا جا رہا ہے، جو کہ شہریوں کے بنیادی انسانی حقوق کی کھلم کھلا خلاف ورزی ہے۔ امن و امان کی صورت حال روز بروز بگڑتی جا رہی ہے اور حکومت کی طرف سے اس بارے میں کوئی سنجیدہ اقدامات دیکھنے میں نہیں آ رہی ہیں ۔بیان میں مزید کہا گیا ہے کہ اشیائے خور و نوش کی قیمتوں میں ہوشربا اضافہ ہو چکا ہے، خصوصا آٹے کی قیمت عام شہری کی پہنچ سے باہر ہوتی جا رہی ہے۔

مہنگائی نے غریب اور متوسط طبقے کو بری طرح متاثر کیا ہے، اور حکومت کی خاموشی اس پر ستم بالائے ستم ہے۔بیان میں کہا گیا ہے کہ کوئٹہ شہر اور اس کے گرد و نواح میں صفائی کی صورتحال انتہائی افسوسناک اور تشویشناک ہو چکی ہے۔ شہر میں جگہ جگہ کوڑا کرکٹ کے ڈھیر، بند نالیاں، گندگی سے بھری سڑکیں اور بدبو دار ماحول نہ صرف شہریوں کی زندگیوں کو اجیرن بنا چکے ہیں، بلکہ یہ صحتِ عامہ کے لیے ایک سنجیدہ خطرہ بن چکے ہیں۔

بیان میں کہا گیا ہے کہ "صفا کوئٹہ پروجیکٹ"، جو کہ عوامی ٹیکسوں سے چلنے والا ایک کثیر بجٹ منصوبہ ہے، مکمل طور پر ناکام ہو چکا ہے۔ اس منصوبے کا مقصد شہر میں جدید صفائی نظام کو متعارف کروا کر کوئٹہ کو صاف اور صحت مند شہر بنانا تھا، لیکن بدقسمتی سے اس منصوبے کی کارکردگی نہ ہونے کے برابر ہے۔ گلی محلوں میں کوڑا نہ اٹھایا جانا، نالیوں کی عدم صفائی، اور صفائی عملے کی عدم موجودگی اس پروجیکٹ کی ناکامی کا واضح ثبوت ہے۔

پشتونخوا نیشنل عوامی پارٹی نے کہا ہے کہ شہر میں موجودہ گندگی اور بد انتظامی سے وبائی امراض پھوٹنے کا شدید خطرہ ہے، خصوصا ڈینگی، ہیضہ، اور دیگر بیماریوں کے امکانات میں تیزی سے اضافہ ہو رہا ہے۔ بلدیاتی ادارے، صفا کوئٹہ کے ذمہ داران، اور صوبائی حکومت اس سنگین صورتحال پر مجرمانہ خاموشی اختیار کیے ہوئے ہیں۔پریس ریلیز میں افغان کڈوال عوام کے خلاف جاری سرچ آپریشنز اور گرفتاریوں پر بھی سخت تشویش کا اظہار کیا گیا ہے۔

انسانی ہمدردی اور بین الاقوامی اصولوں کے تحت افغان کڈوال عوام کے ساتھ ناروا سلوک کسی صورت قابلِ قبول نہیں۔پشتونخوا نیشنل عوامی پارٹی نے تمام شہریوں، محنت کشوں، طلبا، تاجر برادری، سول سوسائٹی، انسانی حقوق کے کارکنان، اور تمام سیاسی و سماجی حلقوں سے اپیل کی ہے کہ وہ اس پرامن احتجاجی مظاہرے میں بھرپور شرکت کر کے اپنی قومی و جمہوری ذمہ داری ادا کریں۔ پارٹی کے تمام علاقائی یونٹوں اور کارکنوں کو ہدایت جاری کی گئی ہے کہ وہ اس احتجاج کو کامیاب بنانے کے لیے بھرپور تیاری کریں اور اپنی عوام دوستی کا عملی ثبوت فراہم کریں