جوآکن فینکس اور نکولا کوگلن سمیت 4,000 فلمی کارکنان کا اسرائیلی فلمی اداروں کے ساتھ کام نہ کرنے کا اعلان

جمعرات 11 ستمبر 2025 14:47

لاس اینجلس (اُردو پوائنٹ اخبارتازہ ترین - اے پی پی۔ 11 ستمبر2025ء) معروف ہالی ووڈ اداکار جوآکن فینکس اور مشہور برطانوی اداکارہ نکولا کوگلن سمیت دنیا بھر سے چار ہزار سے زائد فلمی کارکنان نے ایک مشترکہ بیان پر دستخط کرتے ہوئے اسرائیلی فلمی اداروں کے ساتھ کام نہ کرنے کا اعلان کیا ہے۔ "فلم ورکرز فار پیلیسٹائن" نامی اس مہم کا مقصد ان اداروں کا بائیکاٹ کرنا ہے جو فلسطینی عوام کے خلاف مبینہ طور پر نسل کشی اور انسانی حقوق کی خلاف ورزیوں میں ملوث سمجھے جاتے ہیں۔

اس بائیکاٹ میں ان فلمی فیسٹیولز، براڈکاسٹرز اور پروڈکشن کمپنیوں سے لاتعلقی اختیار کرنے کا مطالبہ کیا گیا ہے جو اسرائیلی ریاستی بیانیے یا سرکاری مالی معاونت سے جڑے ہوئے ہیں۔ دستخط کنندگان میں ایما اسٹون، اولیویا کولمین، آوا ڈیویرنے اور مارکی رُفّالو جیسے عالمی شہرت یافتہ فنکار بھی شامل ہیں۔

(جاری ہے)

ان کا مؤقف ہے کہ فن و ثقافت کو ظلم کے خلاف آواز بلند کرنی چاہیے، نہ کہ اس کا حصہ بننا چاہیے۔

بیان میں یہ بھی واضح کیا گیا ہے کہ یہ بائیکاٹ کسی فرد یا قومیت کے خلاف نہیں بلکہ مخصوص ادارہ جاتی سطح پر ہے۔ دوسری جانب اسرائیلی فلمی صنعت نے اس بائیکاٹ کو "انتہائی تشویش ناک" قرار دیتے ہوئے کہا ہے کہ اس سے فنکاروں کی آزادی اور تخلیقی تبادلوں کو نقصان پہنچ سکتا ہے۔ اس اقدام نے دنیا بھر میں ایک نئی بحث چھیڑ دی ہے کہ فنکارانہ ذمے داریاں سیاسی و اخلاقی حوالوں سے کس حد تک جڑی ہوئی ہیں۔