ڑ* جامع المنہاج لاہور میں دو روزہ عالمی فنِ قرأ ت کورس کی اختتامی تقریب

aہور (اُردو پوائنٹ اخبارتازہ ترین - آن لائن۔ 11 ستمبر2025ء) منہاج انسٹیٹیوٹ برائے قرأت و تحفیظ القرآن کے زیراہتمام جامع المنہاج آغوش کمپلیکس لاہور میں دو روزہ ’’عالمی فنِ قرأت کورس‘‘ کی اختتامی تقریب منعقد ہوئی۔ تقریب میں ملک پاکستان کے نامور قرآن و اساتذہ کے ساتھ ساتھ ایران اور عراق سے بین الاقوامی شہرت یافتہ قراء نے خصوصی شرکت کی۔

مہمان قراء نے اپنی دلنشین آواز میں قرآن کریم کی تلاوت سے حاضرین کو مسحور کر دیا۔ ایران و عراق سے تشریف لانے والے معروف قراء شیخ القراء قاری حامد شاکر نڑاد، زینت القراء صالح مہدی زادہ اوراستاد القراء قاری حسنین جعفر حسن الحلو نے طلبہ کو تلاوت، تجوید اور فنِ قرأت کی عملی تربیت دی۔ تقریب میں ڈائریکٹر انٹرفیتھ ریلیشنز سہیل احمد رضا، ڈائریکٹر آغوش کمپلیکس کرنل(ر) مبشر اقبال، پرنسپل منہاج انسٹیٹیوٹ علامہ محمد عباس نقشبندی، وائس پرنسپل قاری سید خالد حمید کاظمی سمیت اساتذہ و طلبہ نے شرکت کی۔

(جاری ہے)

سہیل احمد رضا نے انٹرنیشنل قرا اور محفل ٹی وی تہران کی پوری ٹیم کا شکریہ ادا کیا۔ زینت القراء صالح مہدی زادہ اور استاد القراء قاری حسنین جعفر حسن الحلو نے اپنی دلنشین تلاوت سے شرکاء کو محظوظ کیا، جبکہ شیخ حسنین جعفر حسن الحلو نے مقامِ حجاز میں فنِ قرأت کی باریکیاں بیان کرتے ہوئے مشق بھی کروائی۔اس تقریب میں مختلف مکاتب فکر کے مدارس و بورڈز سے آئے ہوئے طلبہ و اساتذہ اور ملک بھر کے 50 سے زائد شہروں اور 100 سے زیادہ مدارس و بورڈز سے تقریباً 300 طلبہ، قراء اور اساتذہ شریک ہوئے۔

اختتامی تقریب سے خطاب کرتے ہوئے پرنسپل منہاج انسٹیٹیوٹ برائے قرأت و تحفیظ القرآن علامہ محمد عباس نقشبندی نے ایران سے آئے قراء کاشکریہ ادا کرتے ہوئے کہاکہ فن قرأت کورس قرآن کریم کی تلاوت کو حسن صوت اور تجوید کے ساتھ عام کرنے کا ذریعہ ہے۔ انہوں نے کہاکہ نوجوان نسل کو قران سے جوڑنے کیلئے اس طرح کے کورسز نہایت اہمیت کے حامل ہیں۔ وائس پرنسپل قاری سید خالد حمید کاظمی نے کہا کہ قرآن کریم کی تلاوت قلوب کو سکون اذہان کو روشنی اور معاشرے کو اتحاد فراہم کرتی ہے اس دو روزہ فن قرأت کورس سے طلبہ کو تجوید، مخارج اور حسن قرأت کے ساتھ قرآن پڑھنے میں بے پناہ بہتری حاصل ہوئی ہے۔