کماد کی کاشت کیلئے جدید ٹیکنالوجی کے حامل گنے کے مشینی پلانٹرسے استفادہ کیا جاسکتا ہے، شوگر کین ریسرچ بورڈ

جمعہ 12 ستمبر 2025 14:20

فیصل آباد (اُردو پوائنٹ اخبارتازہ ترین - اے پی پی۔ 12 ستمبر2025ء) زراعت کے شعبہ میں انقلابی اقدام اٹھاتے ہوئے مختصر ترین وقت میں زیادہ سے زیادہ رقبہ پر کماد کی کاشت یقینی بنانے کیلئے ہالینڈ سے درآمد شدہ جدید ٹیکنالوجی کے حامل گنے کے مشینی پلانٹرزسے ایک گھنٹے میں کما د کی ایک ایکڑ سے بھی زائد رقبے پر آسانی سے کاشت ممکن ہو سکتی ہے۔

(جاری ہے)

شوگر کین ریسرچ ڈویلپمنٹ بورڈ کے ترجمان نے بتایا کہ اس مشینی پلانٹر سے نہ صرف زمین کی تیاری کا وقت اور سرمایہ دونوں بچ سکیں گے بلکہ اس سے کماد کی فصل کا 20سے 30فیصد زائد اگاؤ بھی ممکن ہو گا جس سے فی ایکڑ پیداوار میں کم وبیش 200من فی ایکڑ سے زائد کا اضافہ متوقع ہے جبکہ لاگت نصف رہ جائے گی،زرعی ترقی کیلئے مشینی کاشت کی اہمیت مسلمہ ہے لہٰذا شوگر کین پلانٹر سے گنے کی معیاری کارکردگی میں زبر دست اضافہ متوقع ہے جو زرعی جدت سے روشناس کرانے میں اہم کردار ادا کرے گا۔

انہوں نے کہا کہ کماد کی کاشت کو وسعت دینے کی پالیسی کے پیش نظر گنے کے مشینی پلانٹر ہالینڈسے امپورٹ کئے گئے ہیں۔ انہوں نے کہا کہ گنے کی مشینی کاشت سے عام کاشتکار کی پیداوار میں اضافے سے نہ صرف کاشتکار کی مالی حیثیت مستحکم بلکہ پاکستان کی زرعی پیداوار میں بھی اضافہ ممکن ہو سکے گا۔