آٹوموٹیوانڈسٹری ڈویلپمنٹ اینڈ ایکسپورٹ پالیسی 2021-26ناکام ہوگئی

جمعہ 12 ستمبر 2025 22:43

لاہور(اُردو پوائنٹ اخبارتازہ ترین - این این آئی۔ 12 ستمبر2025ء)آٹوموٹیو انڈسٹری ڈویلپمنٹ اینڈ ایکسپورٹ پالیسی 2021-26ناکام ہو گئی،پانچ سال میں گاڑیوں اور پرزہ جات کی دس فیصد لازمی برآمد کا ہدف پورا نہ ہوسکا،آڈیٹر جنرل نے ناکامی کی وجوہات جاننے کے لیے انکوائری کی ہدایت کر دی۔

(جاری ہے)

آڈٹ رپورٹ کے مطابق کار مینوفیکچررز اور وزارت صنعت وپیداوار برآمدات بڑھانے اور صارفین کا تحفظ کرنے میں ناکام رہے،قیمت وصول کرنے کے باوجود گاڑیاں بروقت فراہم نہ کی گئیں جبکہ اون منی کی وصولی اورلیٹ ڈیلیوری سنگین مسئلہ قراردیا گیا۔

رپورٹ کے مطابق کارسازکمپنیاں 20فیصد ڈائون پیمنٹ پالیسی پر بھی عمل نہ کر سکیں اور نہ ہی گاڑیوں کی بکنگ، ڈیلیوری اور رقوم کی واپسی کا ریکارڈ پیش کیا۔دستاویز کے مطابق انجینئرنگ ڈیویلپمنٹ بورڈ ایکسپورٹ کا ڈیٹا اکھٹا نہ کرسکا اور غیرقانونی چینلز کے ذریعے پرزہ جات کی درآمد کی بھی نشاندہی کی گئی۔آڈیٹرجنرل نے پالیسی پر عملدرآمد میں ناکامی کو انتظامیہ کی سنگین کوتاہی قرار دیتے ہوئے مستقبل میں موثر اقدامات پر زور دیا ہے۔