صوبائی وزیر قانون آفتاب عالم ایڈووکیٹ نے کوہاٹ میں خلوت ڈیم کا سنگِ بنیاد رکھ دیا

اتوار 14 ستمبر 2025 21:10

پشاور (اُردو پوائنٹ اخبارتازہ ترین - اے پی پی۔ 14 ستمبر2025ء) خیبر پختونخوا کے وزیر قانون و پارلیمانی امور آفتاب عالم ایڈووکیٹ نے ضلع کوہاٹ کی یونین کونسل زیارت شیخ اللہ داد کے علاقہ مندونی میں خلوت ڈیم کا سنگ بنیاد رکھ دیا۔ اس موقع پر چیئرمین تحصیل گمبٹ ساجد اقبال اور ڈپٹی کمشنر کوہاٹ رحیم اللہ محسود بھی ان کے ہمراہ تھے۔ تقریب میں علاقہ عمائدین، منتخب نمائندے، کسان اور محکمہ آبپاشی کے افسران بھی شریک ہوئے۔

سنگ بنیاد رکھنے کے بعد منصوبے پر باقاعدہ کام کا آغاز کر دیا گیا ہے۔ محکمہ آبپاشی کے حکام کے مطابق ڈیم کی تکمیل کے بعد 2 سے 3 ہزار ایکڑ زرعی اراضی سیراب ہوگی جس سے فصلوں کی پیداوار میں خاطر خواہ اضافہ اور مقامی زرعی معیشت کو فروغ ملے گا۔ روایتی ڈیمز کے برعکس، جہاں پانی مقررہ وقفوں پر چھوڑا جاتا ہے، خلوت ڈیم کسانوں کو 24 گھنٹے مسلسل پانی کی فراہمی یقینی بنائے گا جس سے لاگت میں کمی اور پیداواری صلاحیت میں اضافہ ہوگا۔

(جاری ہے)

تقریب سے خطاب کرتے ہوئے وزیر قانون نے کہا کہ صوبائی حکومت کی اولین ترجیح منصوبے کی بروقت تکمیل ہے۔ انہوں نے کہا کہ مفاد عامہ کو مد نظر رکھتے ہوئے یہ منصوبہ جلد مکمل کیا جائے گا۔علاقہ مکینوں اور کسانوں نے اس منصوبے کو خوش آئند قرار دیتے ہوئے کہا کہ یہ دیرینہ پانی کی قلت کے مسئلے کا حل اور زرعی پیداوار بڑھانے کی جانب ایک اہم پیش رفت ہے۔