Live Updates

دریائوں میں شدید سیلابی صورتحال کے باعث 47سو سے زائد دیہات،47 لاکھ 20 ہزار سے زائدلوگ متاثر ہوئے ، پی ڈی ایم اے

پیر 15 ستمبر 2025 14:41

لاہور (اُردو پوائنٹ اخبارتازہ ترین - اے پی پی۔ 15 ستمبر2025ء) پی ڈی ایم اے نے دریائے راوی ،ستلج اور چناب میں سیلاب کے باعث ہونے والے نقصانات کی رپورٹ جاری کر دی۔دریائے راوی، ستلج اور چناب میں شدید سیلابی صورتحال کے باعث 47سو سے زائد دیہات جبکہ مجموعی طور پر 47 لاکھ 20 ہزار لوگ متاثر ہوئے۔ ریلیف کمشنر پنجاب نبیل جاوید نے تفصیلات بتاتے ہوئے کہا کہ دریائے چناب میں سیلاب کے باعث مجموعی طور پر 2484 موضع جات متاثر ہوئے،دریائے ستلج میں سیلاب کے باعث 719 موضع جات متاثر ہوئے۔

دریائے راوی میں سیلاب کے باعث مجموعی طور پر 1458 موضع جات متاثر ہوئے۔ دریائوں میں سیلابی صورتحال کے باعث مجموعی طور پر 47 لاکھ 20 ہزار لوگ متاثر ہوئے۔ ریلیف کمشنر نے کہا کہ سیلاب میں پھنس جانے والے 25 لاکھ 64 ہزار لوگوں کو محفوظ مقامات پر منتقل کیا گیا،شدید سیلاب سے متاثرہ اضلاع میں 372 ریلیف کیمپس قائم کیے گئے ہیں،سیلاب سے متاثر ہونے والے اضلاع میں 454 میڈیکل کیمپس بھی قائم کیے گئے ہیں۔

(جاری ہے)

انہوں نے کہا کہ مویشیوں کو علاج معالجے کی سہولت فراہم کرنے کے لیے 385 ویٹرنری کیمپس قائم کیے گئے ہیں، متاثرہ اضلاع میں ریسکیو و ریلیف سرگرمیوں میں 20 لاکھ 70 ہزار جانوروں کو محفوظ مقامات پر منتقل کیا گیا۔ ریلیف کمشنر نے کہا کہ منگلا ڈیم 94 فیصد جبکہ تربیلا ڈیم 100 فیصد تک بھر چکا ہے، ردریائے ستلج پر موجود انڈین بھاکڑا ڈیم 88 فیصد تک بھر چکا ہے، پونگ ڈیم 94 فیصد جبکہ تھین ڈیم 88 فیصد تک بھر چکا ہے۔ریلیف کمشنر نے کہا کہ حالیہ سیلاب سے مختلف حادثات میں 104 شہری جاں بحق رپورٹ ہوئے، گزشتہ 24 گھنٹوں میں سیلاب کے باعث کوئی جانی نقصان رپورٹ نہیں ہوا۔ انہوں نے کہا کہ وزیر اعلی پنجاب کی ہدایات کے پیش نظر شہریوں کے نقصانات کا ازالہ کیا جائے گا۔