یورپی کھیل فسٹ بال نے پاکستان میں دھوم مچا دی

کراچی(اُردو پوائنٹ اخبارتازہ ترین - این این آئی۔ 15 ستمبر2025ء)یورپ کا دلچسپ اور معروف کھیل فسٹ بال پاکستان میں بھی کھیلا جانے لگا۔کھیلوں سے بے پناہ محبت رکھنے والے دوستوں کے ایک گروپ ارسلان علی، عبداللہ مغل، حمزہ ملک ، محمد قیصر اور خرم شہزاد نے یورپی ٹیم گیم فسٹ بال پاکستان میں بھی متعارف کروا دیا۔ پاکستان کی 78 سالگرہ کے حوالے سے آزادی کپ کے نام سے فسٹ بال کا ایک نمائشی میچ منعقد کیاگیاجو پاکستان فسٹ بال فیڈریشن کے صدر ارسلان علی کی خصوصی ہدایت پر پنجاب فسٹ بال ایسوسی ایشن کے جنرل سیکرٹری خرم شہزاد نے آرگنائز کیا۔

آرگنائزنگ کمیٹی کے چیئرمین پاکستان فسٹ بال ایسوسی ایشن کے خزانچی حمزہ ملک تھے ان کے ہمراہ ممبران میں خیبر پختونخوا سے پی ایف ایف کے سینئر نائب صدرمحمد صدیق، نائب صدر روما آرائیں ،لیگل ایڈوائزر سید اسد بخاری ،پی ایف اے کی نائب صدر سحر ڈار ،رانا اکبر، عمار جعفر اور نائل قریشی شامل تھے۔

(جاری ہے)

یونیورسل کالج لاہور (یو سی ایل)کے سر سبز میدان میں پنجاب گرین اور پنجاب وائٹ کے درمیان منعقد ہونے والے آزادی کپ فسٹ بال میچ کا افتتاح ایڈمن ڈائریکٹر یو سی ایل شہزاد مغل نے کیا۔

پنجاب گرین کے کپتان سید رافع بخاری اور پنجاب وا ئٹ کے کپتان سید وفا عباس تھے ۔شاہیر مغل اور عمیر کھوکھر نے شاندار کھیل پیش کرکے شائقین سے خوب داد تحسین حاصل کی۔پنجاب وائٹ نے پنجاب گرین کو 2 کے مقابلے میں 1 سیٹ سے شکست دیکر پہلے آزادی کپ فسٹ بال کا چمپئن بننے کا اعزاز حاصل کیا۔پہلا سیٹ پنجاب وائٹ نے 11/7 سے جیتا۔دوسرا سیٹ پنجاب گرین نے 11/9 سے اپنے نام کیا۔

تیسرا فائنل سیٹ پنجاب وائٹ نے 11/6 سے جیت کرپہلے آزادی کپ فسٹ بال میچ کا چمپئن بننے کا اعزاز حاصل کیا۔شاہیر مغل مین آف دی میچ اور عمیر کھوکھر آزادی کپ کے بہترین کھلاڑی قرار پائے۔پاکستان فسٹ بال فیڈریشن کے سیکرٹری جنرل عبداللہ مغل نے میچ ریفری کے فرائض انجام دیئے۔میچ کے اختتام پر مہمانان خصوصی جہانزیب خان ،خیبر پختونخوا سے تعلق رکھنے والے سابق انٹرنیشنل ہاکی ایمپائر ڈاکٹر اسلم اور ایچ آرا سپورٹس کے چیف ایگزیکٹو محمد حفیظ نے کھلاڑیوں میں سرٹیفکیٹ ،وننگ ٹرافی اور شیلڈز تقسیم کیں۔

آزادی کپ فسٹ بال میچ کامیاب بنانے کیلئے ایچ آرا سپورٹس کے چیف ایگزیکٹو محمد حفیظ نے کھلاڑیوں کو کٹس اسپانسر کیںاورفیروز انٹرنیشنل سپورٹس گارمنٹس کے سی ای او عالیان مرزا نے میچ آفیشلز کیلئے ٹی شرٹس فراہم کیں جبکہ سکس بی فوڈ انڈسٹریز کے ایم ڈی عمر شیخ نے کھلاڑیوں ، میچ آفیشلز ، مہمانوں سمیت شائقین کیلئے منرل واٹر ، بوتل جوس اور کین جوس فراہم کیے۔

پاکستان فسٹ بال فیڈریشن کے صدر ارسلان علی نے کہا کہ فسٹ بال محبت اور جذبے کا کھیل ہے ،جہاں دونوں ٹیموں کے کھلاڑیوں کا ٹیلنٹ ، ٹیکنیک اورمہارت کا مقابلہ ہوتا ہے،روایتی یورپی ٹیم گیم فسٹ بال کھیل کسی بھی موسم میں انڈور اور آئوٹ ڈور کھیلا جا تا ہے جو صحت عامہ کو بہتر بنانے ،ایک مہذب اور متحرک شہری کی تعمیر کیلئے ایک طویل المدتی حکمت عملی کا حصہ بھی ہے ،فسٹ بال کاکھیل جسمانی طور پر صحت مند اور ذہنی طور پر مہذب معاشرے کی تعمیر میں اپنا حصہ ڈال رہا ہے۔