Live Updates

بدن تھکن سے چور، مگر سیلاب متاثرین کی خدمت کیلئے عزم جواں، حوصلے توانا ہیں‘رانا سکندر حیات

جنوبی پنجاب میں نواز شریف سکول آف ایمیننس میں سیلاب متاثرین کے لیے بڑا امدادی کیمپ قائم کیا ہے صرف اور صرف خدمت کے جذبے کے ساتھ گذشتہ کئی روز سے مسلسل فیلڈ میں موجود ہوں‘ صوبائی وزیر تعلیم

پیر 15 ستمبر 2025 22:57

بدن تھکن سے چور، مگر سیلاب متاثرین کی خدمت کیلئے عزم جواں، حوصلے توانا ..

لاہور (اُردو پوائنٹ اخبارتازہ ترین - این این آئی۔ 15 ستمبر2025ء) وزیر تعلیم پنجاب رانا سکندر حیات کئی راتوں سے جاگنے کی وجہ سے تھکن سے چور ہونے کے باوجود توانا حوصلے اور جوان عزم کے ساتھ سیلاب متاثرین کی خدمت کیلئے مسلسل فیلڈ میں موجود ہیں۔ رانا سکندر حیات گذشتہ ایک ہفتے سے موقع پر موجود رہتے ہوئے ریلیف آپریشن کی نگرانی کر رہے ہیں۔ مختلف دیہاتوں میں متاثرین اور ذرائع ابلاغ کے نمائندوں سے گفتگو کرتے ہوئے وزیر تعلیم نے کہا ہے کہ ملتان کے سیلاب زدہ علاقوں میں کم و بیش 8 ہزار افراد کے انخلا اور آبادکاری کے آپریشن میں ذاتی طور پر شریک ہوا ہوں اور اپنی نگرانی میں علی پور، جلالپور اور سیت پور سے ہزاروں افراد کا کامیاب انخلا کروایا اور آبادکاری میں ان کی مدد کی ہے۔

انہوں نے کہا کہ وزیر اعلی پنجاب کی کابینہ کے اراکین کے فیلڈ میں ملسل موجود رہنے کی وجہ سے سیلاب متاثرین کو بھی حوصلہ ہوا ہے اور ریلیف آپریشن منظم طریقے سے انجام پایا ہے۔

(جاری ہے)

انہوں نے کہا کہ جنوبی پنجاب میں نواز شریف سکول آف ایمیننس میں سیلاب متاثرین کے لیے بڑا امدادی کیمپ قائم کیا گیا ہے جہاں تین ہزار سے زائد خیمے، تین وقت کا معیاری کھانا ، پینے کا صاف پانی مہیا کیا جا رہا ہے جبکہ صاف ستھرے واش رومز، طبی سہولیات اور ضروری ادویات کی فراہمی ممکن بنائی گئی ہے جبکہ سکول کو سیلاب متاثرین کی عارضی رہائش قرار دیا گیا ہے۔

انہوں نے مزید کہا کہ سیلاب متاثرین کے بچوں کو بھی دو وقت کا دودھ فراہم کیا جا رہا ہے جبکہ متاثرین کو ان کے کیمپوں میں تین وقت کے معیاری کھانے اور پینے کیلئے صاف پانی کی سہولت اس انداز سے فراہم کی گئی ہے کہ میں اور سینئر منسٹر خود بھی وہی کھانا اور پانی استعمال کرتے ہیں۔ انہوں نے کہا کہ علی پور کی آخری آبادی تک پانی پھیلے ہونے کے باوجود کلینک آن وہیلز اپنا کام کر رہی ہے اور میڈیکل کیمپس میں روزانہ 250 مریضوں کا علاج ممکن بنا رہے ہیں۔

وزیر تعلیم نے کہا کہ سیت پور کا راستہ منقطع ہونے کے باوجود متاثرین کو فوڈ سپلائیز دن میں 3 مرتبہ بھیجی جا رہی ہے۔ انہوں نے مزید کہا یہ لمحے عوام کے ساتھ کھڑے رہنے اور ان کے دکھ بانٹنے کے ہیں۔ صرف اور صرف خدمت کے جذبے کے ساتھ گذشتہ کئی روز سے مسلسل فیلڈ میں موجود ہیں۔ وزیر تعلیم نے کہا کہ ہم متاثرین کا دکھ ختم تو نہیں کر سکتے لیکن اس میں جتنی کمی کر سکتے ہیں، کر رہے ہیں۔