Live Updates

پاکستان کرکٹ کو بچانا ہے تو بابر اوررضوان کو واپس لانا ہوگا، ماہر علم نجوم

منگل 16 ستمبر 2025 13:00

کراچی(اُردو پوائنٹ اخبارتازہ ترین - این این آئی۔ 16 ستمبر2025ء) بھارت سے شکست کے بعد معروف ماہر علم نجوم نے پاکستان کرکٹ کی بقا بابر اور رضوان کی واپسی سے مشروط کی ہے۔نجی ٹی وی سے گفتگو کرتے ہوئے معروف ماہر علم نجوم آغا بہشتی نے پیشگوئی کرتے ہوئے پاکستان کرکٹ کی ترقی اور بقا کو بابر اعظم اور محمد رضوان کی ٹیم میں واپسی سے مشروط کر دیا ہے۔

آغا بہشتی نے کہا کہ جو کھلاڑی عروج پر جاتا ہے، اس کو نیچے لانے کی کوشش ہوتی ہے اور یہی بابر اعظم کے ساتھ ہو رہا ہے۔ یہ لوگ بابر اعظم کی شہرت سے ڈرتے ہیں کہ کل وہ میچ میں سب سے زیادہ اسکور نہ کر لے۔انہوں نے کہا کہ اس وقت بابر اعظم کی ٹیم کو اتنی ضرورت ہے، جیسے کہ مچھلی کو پانی کی ضرورت ہوتی ہے۔ اگر پاکستان کرکٹ کو بچانا ہے تو بابر اعظم اور رضوان کو ٹیم میں واپس لانا ہوگا۔

(جاری ہے)

یہ دونوں سلمان آغا اور فہیم اشرف سے بہتر تو ہیں۔ماہر نجوم کا کہنا تھا کہ جس کھلاڑی نے پاکستان کی طرف سے ٹی 20 کرکٹ میں 4 ہزار سے زیادہ رنز بنا رکھے ہوں۔ ٹیسٹ اور ون ڈے میں بھی رنز کا ڈھیر لگا رکھا ہو۔اس کو ٹیم سے باہر رکھا ہوا ہے۔ ہر کھلاڑی چھکے نہیں مارتا۔ ٹیم میں سینئر کو رکھ کو جونیئر کو سکھایا جاتا ہے اور اسی طرح کرکٹ آگے بڑھتی ہے۔ان کا کہنا تھا کہ بابر اعظم دو سال تک آئی سی سی رینکنگ میں نمبر ون بلے باز رہا، کسی اور پاکستانی کو یہ اعزاز حاصل ہوا۔ ٹی وی پر بیٹھ کر تجزیے کرنا اور باتیں کرنا آسان ہے، لیکن حقیقت یہی ہے کہ بابر اعظم کے ساتھ زیادتی ہو رہی ہے۔