Live Updates

آئی سی سی بھارت کا نوکرہے، توصیف احمد کا سخت ردعمل

منگل 16 ستمبر 2025 12:39

کراچی (اُردو پوائنٹ اخبارتازہ ترین - این این آئی۔ 16 ستمبر2025ء) ایشیا کپ میں بھارتی کھلاڑیوں کے پاکستانی کرکٹرز سے ہاتھ نہ ملانے پر توصیف احمد نے سخت ردعمل دیا ہے۔ایشیا کپ میں گزشتہ روز ہونے والے پاک بھارت ٹاکرے میں پاکستان کو شکست ہوئی۔ تاہم اس میچ میں بھارتی کھلاڑیوں کی جانب سے پاکستانی کرکٹرز سے ہاتھ نہ ملانے پر پاکستان سمیت دیگر ممالک کے سابق کرکٹرز نے اس کو بھارتی کھلاڑیوں کی جانب سے اسپورٹس مین اسپرٹ کے منافی قرار دیا ہے۔

سابق قومی کرکٹر توصیف احمد نے آئی سی سی کو بھارت کا نوکر قرار دیتے ہوئے پی سی بی کے میچ ریفری تبدیل نہ کرنے تک ایشیا کپ کا بائیکاٹ کرنے کے فیصلے کو بالکل درست قرار دیتے ہوئے کہا ہے کہ جب یہ فیصلہ کر لیا ہے تو اس پر قائم رہنا چاہیے۔

(جاری ہے)

توصیف احمد کا کہنا تھا کہ میچ ریفری آئی سی سی کا نمائندہ ہوتا ہے نہ کہ کسی حکومت یا بورڈ کا ترجمان جو ان کے پیغامات پر گراؤنڈ میں عملدرآمد کرائے۔

وہ یہ کہنے کا مجاز نہیں کہ کھلاڑی ایک دوسرے سے ہاتھ نہ ملائیں۔سابق اسپنر کا کہنا تھا کہ ہم تو کھیل کو سیاست سے آلودہ نہیں کرتے اور کرکٹ کو جاری رکھنا چاہتے ہیں، لیکن جب بھی متنازع بات آئی ہے وہ بھارت کی طرف سے آتی ہے۔ان کا مزید کہنا تھا کہ دنیا جانتی ہے کہ آئی سی سی ہر معاملے میں بھارت کو سپورٹ کرتا اور پاکستان کو نظر انداز کرتا ہے۔

ایشیا کپ میں شریک ٹیمیں اس معاملے پر خاموش نہ رہیں بلکہ انہیں بھی اس پر آواز اٹھانی چاہیے۔توصیف احمد نے یہ بھی کہا کہ رافیل طیارے پاکستانی کرکٹرز نے نہیں بلکہ ہماری فوج نے گرائے تھے۔ اس معاملے کا کرکٹرز سے کیا لینا دینا۔ بھارتی کپتان نے آکر جو بات کہی اس سے لگتا تھا کہ اس کو پوری طرح تیار کر کے بھیجا گیا ہے۔ سنجے منجریکر کو اس وقت ہی سوریا کمار کے ہاتھ سے مائیک لے لینا چاہیے تھا، لیکن یہاں تو سب کی ملی بھگت چل رہی ہے۔