کچے کے ڈاکوئوں کا خاتمہ ہر حال میں یقینی بنایا جائے،وزیراعلیٰ سندھ کی ہدایت

کراچی (اُردو پوائنٹ اخبارتازہ ترین - اے پی پی۔ 16 ستمبر2025ء) وزیراعلیٰ سندھ سید مراد علی شاہ نے کچے کے علاقے میں ڈاکوئوں کے خلاف جاری کریک ڈائون کا جائزہ لیتے ہوئے اس بات پر زور دیا کہ کچے کے ڈاکوئوں کا خاتمہ ہر حال میں یقینی بنایا جائے۔منگل کو وزیر اعلی ہائوس سے جاری اعلامیہ کے مطابق وزیراعلیٰ سندھ نے پولیس حکام کو ہدایت کی کہ ڈاکوئوں کے خلاف انٹیلی جنس بنیادوں پر آپریشن میں مزید تیزی لائی جائے۔

انہوں نے کہا کہ کچے کے علاقے سیلاب کی زد میں ہیں اور امکان ہے جرائم پیشہ عناصر وہاں سے نکل گئے ہوں یہی وقت ہے کہ انہیں ختم کر دیا جائے۔ انہوں نے چیف سیکرٹری آصف حیدر کو ہدایت کی کہ کچے کے انفراسٹرکچر کے لیے تفصیلی منصوبہ تیار کریں، جس میں سڑکیں، اسکول، اسپتال، ڈسپنسریاں اور ٹرانسپورٹ کی سہولیات شامل ہوں۔

(جاری ہے)

وزیراعلی نے یقین دلایا کہ سیلاب کی صورتحال بہتر ہوتے ہی بحالی اور ترقیاتی منصوبے شروع کر دیے جائیں گے۔

یہ اجلاس وزیراعلیٰ ہائوس میں منعقد ہوا جس میں صوبائی وزیر داخلہ ضیا الحسن لنجار، میئر کراچی مرتضیٰ وہاب، چیف سیکرٹری آصف حیدر شاہ، انسپکٹر جنرل پولیس غلام نبی میمن، سیکرٹری داخلہ اقبال میمن،پرنسپل سیکرٹری آغا واصف،کمشنر کراچی حسن نقوی، سینئر ممبر بورڈ آف ریونیو خالد حیدر شاہ، سیکرٹری بلدیات وسیم شمشاد، ایڈیشنل انسپکٹر جنرل آزاد خان، چیف آپریٹنگ آفیسر واٹر بورڈ اسد اللہ خان اور دیگر اعلی حکام شریک تھے۔

اس موقع پر وزیر داخلہ ضیا الحسن لنجار اور انسپکٹر جنرل پولیس غلام نبی میمن نے وزیراعلیٰ کو آپریشن کی پیش رفت سے آگاہ کیا۔ اجلاس کو بتایا گیا کہ اکتوبر 2024 سے کچے کے علاقے میں ٹیکنالوجی پر مبنی آپریشنز میں تیزی لائی گئی ہے۔اب تک 760 ٹارگٹڈ آپریشنز اور 352 سرچ آپریشنز کیے جا چکے ہیں۔ جنوری 2024 سے اب تک 159 ڈاکو ہلاک کیے گئے ہیں جن میں سکھر میں 10، گھوٹکی میں 14، کشمور میں 46 اور شکارپور میں 89 شامل ہیں۔

اس کے علاوہ 823 مجرم گرفتار کیے گئے جبکہ آٹھ انتہائی مطلوب ملزمان بھی مارے گئے۔ پولیس نے 962 مختلف نوعیت کے ہتھیار بھی برآمد کیے۔وزیراعلیٰ سندھ سید مراد علی شاہ نے زور دیا کہ کچے کے ڈاکوئوں کا خاتمہ ناگزیر ہے اور یہ ہر صورت میں یقینی بنایا جائے۔ انہوں نے کہا کہ گھوٹکی کندھکوٹ پل کی تعمیر پورے علاقے کو کھول دے گی، رابطے بہتر ہوں گے اور امن و امان کی صورتحال میں بھی بہتری آئے گی۔

انہوں نے کہا کہ سندھ حکومت کی اولین ترجیح ہر حال میں امن و امان کی بحالی ہے۔ایک اور اجلاس میں وزیراعلیٰ سندھ نے کراچی میں غیر قانونی ہائیڈرنٹس اور ٹینکرز کے خلاف کارروائی کا بھی جائزہ لیا۔میئر کراچی مرتضیٰ وہاب نے بتایا کہ اب تک 243 غیر قانونی ہائیڈرنٹس مسمار کیے جا چکے ہیں، 212 مقدمات درج کیے گئے ہیں اور 103 افراد کو گرفتار کیا گیا ہے۔انہوں نے مزید بتایا کہ فی الحال 3 ہزار 200 ٹینکرز کو کیو آر کوڈ کے ذریعے رجسٹرڈ کیا گیا ہے، جس سے پانی کی تقسیم کے نظام کو بہتر بنایا گیا ہے اور واٹر بورڈ کی آمدنی میں 6کروڑ روپے کا اضافہ ہوا ہے۔وزیراعلیٰ سندھ نے ہدایت کی کہ غیر قانونی ٹینکر مافیا کے خلاف کریک ڈائون اس وقت تک جاری رہے جب تک اسے مکمل طور پر ختم نہ کر دیا جائے۔