پاکستان سمیت دنیا بھر میں امراض قلب سے بچائو کا عالمی دن 29 ستمبر کو منایا جائے گا

بدھ 17 ستمبر 2025 23:03

جہانیاں(اُردو پوائنٹ اخبارتازہ ترین - آن لائن۔ 17 ستمبر2025ء) پاکستان سمیت دنیا بھر میں امراض قلب سے بچائو کا عالمی دن 29 ستمبر کو منایا جائے گا۔ اس دن کو منانے کا مقصد لوگوں میں دل کی بیماریوں کے متعلق مکمل آگاہی اور ان سے بچائو کے لیے شعور پیداکرناہے امراض قلب سے بچائو کے عالمی دن کے موقع پر جہانیاں سمیت ملک بھر میں محکمہ صحت اور سماجی تنظیموں کے زیر اہتمام تقریبات کا اہتمام کیا جائے گا جن میں ماہرین امراض قلب سے بچائو کے متعلق آگاہی فراہم کریں گے۔

دنیا میں لاکھوں افراد ہر سال دل کی بیماریوں کی وجہ سے موت کے منہ میں چلے جاتے ہیں۔ پاکستان میں ہر سال تقریباً دو لاکھ افراد دل کے امراض کے باعث ہلاک ہوجاتے ہیں۔عالمی ادارہ برائے صحت نے خبردار کیا ہے کہ 2030 تک دنیا بھر میں دل کے امراضِ کے سبب اموات کی شرح سترہ اعشاریہ تین ملین سے بڑھ کر 23.6 ملین تک پہنچ سکتی ہے۔

(جاری ہے)

دل کے امراض کی بڑی وجوہات میں تمباکو نوشی، غیر صحت مند غذا اور جسمانی سرگرمیوں کا فقدان ہے۔

دل کے امراض سے بچنے کے لیے تمباکو نوشی ترک کی جائے، روزانہ پھل اورسبزیوں کا استعمال کیا جائے اور دن بھر کی خوراک میں میں ایک چائے کے چمچ سے زیادہ نمک کے استعمال سے پرہیز کیا جائے۔دل کی بیماریوں سے بچنے کے لیے روزانہ کم از کم آدھا گھنٹہ جسمانی سرگرمیوں میں گزارا جائے یا ورزش کی جائے۔