سمبڑیال، کاشتکاروں کو منظور شدہ چارے کی برقت کاشت یقینی بنانے کی ہدایت

جمعرات 18 ستمبر 2025 11:37

سیالکوٹ (اُردو پوائنٹ اخبارتازہ ترین - اے پی پی۔ 18 ستمبر2025ء) اسسٹنٹ ڈائریکٹر محکمہ زراعت (توسیع)سمبڑیال ڈاکٹر افتخار حسین بھٹی نے کاشتکاروں کو چارے کی منظور شدہ قسم چناب برسیم، جئی، لوسرن، رائی اور بہاریہ مکئی کی برقت کاشت یقینی بنانے کی ہدایت کی ہے ۔

(جاری ہے)

انہوں نے جمعرات کو دفتر میں آئے کاشتکاروں کے وفد سے گفتگو کرتے ہوئے کہا ہے کہ فصل سے ضررساں کیڑوں کے علاوہ بیماریوں کا بروقت انسداد بھی ضروری ہے،غذائی اور نقد آور فصلوں کو مدنظر رکھتے ہوئے برسیم اور جئی چارے کی مخلوط کاشت کے فروغ سے اعلی غذائیت سے بھر پور چارے کی فراہمی سے دودھ اور گوشت کی پیداوار میں بھی خاطر خواہ اضافہ ہو گا۔

انہوں نے کہا کہ پاکستان کی معیشت کا زیادہ تر انحصار زراعت پر ہے ،تجربات سے ثابت ہوا ہے کہ اگر ہم زمین کا صحیح انتخاب وتیاری، اچھا بیج، مناسب اور متناسب کھادوں کا استعمال، بروقت کاشت، برداشت ،دیگر زرعی عوامل اور ماہرین کی سفارشات پر عمل کریں تو چارے کی فی ایکڑ پیداوار میں نمایاں اضافہ کیا جاسکتاہے۔