واشنگٹن میں ٹرمپ کا ہاتھ میں بٹ کوائن تھامے 12 فٹ کا سنہری مجسمہ نصب

جمعرات 18 ستمبر 2025 22:51

واشنگٹن (اُردو پوائنٹ اخبارتازہ ترین - آن لائن۔ 18 ستمبر2025ء) امریکا کے صدر ڈونلڈ ٹرمپ کا 12 فٹ بلند سنہری مجسمہ، جس میں وہ بٹ کوائن تھامے ہوئے ہیں، واشنگٹن میں امریکی کیپیٹل کے باہر نصب کر دیا گیا۔یہ دیوقامت اور دلکش مجسمہ عوام کی بڑی تعداد کو اپنی جانب متوجہ کر رہا ہے اور ساتھ ہی تنازع کا باعث بھی بن گیا ہے۔

(جاری ہے)

امریکی میڈیا کے مطابق یہ مجسمہ کرپٹو کرنسی کے سرمایہ کاروں کی جانب سے فنڈ کیا گیا ہے، دلچسپ امر یہ ہے کہ یہ اقدام فیڈرل ریزرو کی جانب سے شرحِ سود میں کمی کے اعلان کے موقع پر سامنے آیا۔

منتظمین کا کہنا ہے کہ یہ فن پارہ ڈیجیٹل کرنسی کے مستقبل، مالیاتی پالیسی اور وفاقی حکومت کے کردار پر بحث کو جنم دینے کے لیے تیار کیا گیا ہے۔ ان کے مطابق یہ مجسمہ ٹرمپ کی کرپٹو کرنسی کے حق میں کھل کر حمایت کو خراجِ تحسین پیش کرتا ہے۔سوشل میڈیا پر مجسمے کی متعدد تصاویر اور ویڈیوز وائرل ہو رہی ہیں جس میں ٹرمپ کے حامی ان کی کرپٹو کرنسی کے لیے آواز بلند کرنے پر ان کی تعریف کر رہے ہیں۔