Live Updates

بارشوں اورسیلاب سے متاثرہ علاقوں میں مجموعی طور پر 51 گرڈ اور 579 فیڈرز متاثر ہوئے، 350 فیڈر مکمل ، 222 جزوی طور پر بحال

ہفتہ 20 ستمبر 2025 15:49

اسلام آباد (اُردو پوائنٹ اخبارتازہ ترین - این این آئی۔ 20 ستمبر2025ء)بارشوں اورسیلاب سے متاثرہ علاقوں میں مجموعی طور پر 51 گرڈ اور 579 فیڈرز متاثر ہوئے، 350 فیڈر مکمل اور 222 کوجزوی طور پر بحال کر دیا گیا۔ہفتے کو پاور ڈویژن کی جانب سے بجلی بحالی پر جاری 20 ستمبر تک کی رپورٹ کے مطابق فیسکو کے زیرِ انتظام علاقوں میں 28 گرڈ اور 81 فیڈرز متاثر ہوئے، متاثرہ فیڈرز میں 54 مکمل اور 27 جزوی طور پر بحال کردئیے گئے،فیسکو کے 24698 متاثرہ صارفین کیلئے بجلی کی بحالی کا کام 20 آئندہ چوبیس گھنٹوں میں مکمل ہونے کی توقع ہے۔

پاورڈویژن کے مطابق لیسکو کے 67 متاثرہ فیڈرز میں سے 66 مکمل اور 1 جزوی طور پر بحال ہوچکے ہیں،لیسکو کے 441 متاثرہ صارفین کیلئے بجلی کی بحالی کا کام 21 ستمبر تک مکمل ہونے کی توقع ہے۔

(جاری ہے)

لیسکو کے زیرِ انتظام علاقے لاہور، ننکانہ، شیخوپورہ اور اوکاڑہ میں بجلی کی بحالی کا کام مکمل کر لیا گیا ہے۔میپکو کے 181 متاثرہ فیڈرز میں سے 21 مکمل اور 153 جزوی طور پر بحال کر لیا گیا ، میپکو کے زیرِ انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا۔

گیپکوکے کے 11 گرڈز اور 103فیڈرزمتاثر ہوئے،متاثرہ فیڈرز میں سے 101 فیڈرز مکمل اور 2 جزوی طور پر بحال ہوچکے ہیں،گیپکو کے 204 متاثرہ صارفین کیلئے بجلی بحالی کا کام سیلاب کا پانی اترنے پر مکمل کر لیا جائے گا۔ پاور ڈویژن رپورٹ کے مطابق پیسکو کے 88 فیڈرز مکمل اور 3 جزوی طور پر بحال کردئیے گئے ہیں،پیسکو کے زیرِ انتظام علاقے سوات، صوابی اور ڈی آئی خان میں بجلی کی بحالی کا کام مکمل ہو چکا ہے۔

ٹیسکو کے علاقے شمالی وزیرستان اور خیبر کے 18 فیڈرز متاثر ہوئے،ٹیسکو کے 17 فیڈر مکمل اور 1 فیڈر جزوی طور پر بحال کر دیا گیا ہے،ٹیسکو کے 996 متاثرہ صارفین کیلئے بجلی کی بحالی کا کام تقریباًً 20 ستمبر تک مکمل ہونے کی توقع ہے، ٹیسکو کے علاقے خیبر میں بجلی کی بحالی کا کام مکمل کرلیا گیا ہے۔ہیزیکو کے زیرِ انتظام علاقے مانسہرہ کے 3 متاثرہ فیڈر مکمل طور پر بحال جبکہ سیپکو کے زیرِ انتظام علاقے کے 35 متاثرہ فیڈر عارضی طور پر بحال کر دئیے گئے ہیں۔