خیبرپختونخوا میں کینسر کے علاج میں انقلابی پیش رفت، مہنگے ترین علاج اب صوبے میں دستیاب ہوں گے، مشیر صحت احتشام علی

ہفتہ 20 ستمبر 2025 21:20

پشاور (اُردو پوائنٹ اخبارتازہ ترین - اے پی پی۔ 20 ستمبر2025ء) وزیراعلیٰ خیبر پختونخوا کے مشیر صحت احتشام علی نے کہا ہے کہ صوبے کی تاریخ میں پہلی بار حیات آباد میڈیکل کمپلیکس پشاور میں سائبر نائف روبوٹک ریڈیو سرجری اور پی ای ٹی/سی ٹی اسکین سہولت قائم کرنے پر عملی اقدامات جاری ہیں، یہ منصوبہ وزیراعلیٰ کی جانب سے عوام کےلیے ایک قیمتی تحفہ ہے۔

اپنے ایک بیان میں مشیر صحت نے کہا کہ اس منصوبے کی تکمیل کےلیے دلچسپی رکھنے والی کمپنیوں سے تجاویز طلب کی جاچکی ہیں۔ یہ تاریخی اقدام صوبے میں کینسر کے علاج کے شعبے میں ایک نئے دور کا آغاز ہے اور برسوں سے موجود بڑے خلا کو پُر کرے گا۔ اب خیبر پختونخوا کے کینسر کے مریضوں کو تشخیص اور علاج کےلیے کراچی یا دیگر شہروں کا رخ نہیں کرنا پڑے گا۔

(جاری ہے)

انہوں نے بتایا کہ صوبے میں ہر سال 11ہزار 7 سو سے زائد نئے کینسر کیسز رپورٹ ہوتے ہیں، ایسے میں یہ سہولت نہایت بروقت اور زندگی بچانے والا قدم ہے۔سائبر نائف سسٹم پیچیدہ اور ناقابلِ آپریشن ٹیومرز کے لیے غیر جراحی اور انتہائی درستگی کے ساتھ ریڈیو سرجری فراہم کرے گا جبکہ پی ای ٹی/سی ٹی اسکین کینسر کی بروقت تشخیص، درست اسٹیجنگ اور موزوں علاج کی منصوبہ بندی کو ممکن بنائے گا۔

احتشام علی نے کہا کہ ان جدید سہولیات کی بدولت علاج کے نتائج بہتر ہوں گے، شرح اموات میں کمی آئے گی اور مریضوں کے معیارِ زندگی میں نمایاں بہتری ہوگی۔ یہ سہولت نہ صرف مریضوں کو جدید علاج فراہم کرے گی بلکہ میڈیکل ریسرچ، تربیت اور استعداد کار میں اضافے کے لیے بھی ایک مرکز کے طور پر کام کرے گی۔انہوں نے کہا کہ یہ اقدام مریضوں اور ان کے خاندانوں پر پڑنے والے معاشی و نفسیاتی بوجھ کو کم کرے گا اور صوبائی صحت کے نظام کو مزید مضبوط بنائے گا۔مشیر صحت نے کہا کہ یہ ایک تاریخی پیش رفت ہے جو نہ صرف بے شمار زندگیاں بچائے گی بلکہ آئندہ نسلوں کے لیے صحت مند مستقبل کی ضمانت بھی فراہم کرے گی۔