کچرا ٹھکانے لگانے کا نیا منصوبہ، پنجاب میں رنگ دار کوڑے دان استعمال کرنے کا حکم

سینئر وزیر موحولیات اینڈ کلائمٹ چینج مریم اورنگزیب منصوبے کی نگرانی کریں گی، اس حوالے سے وزیر تعلیم رانا سکندر حیات اور لوکل گورنمنٹ ذیشان ملک کو ٹارگٹس سونپ دیئے گئے

ساجد علی اتوار 21 ستمبر 2025 14:15

کچرا ٹھکانے لگانے کا نیا منصوبہ، پنجاب میں رنگ دار کوڑے دان استعمال ..

لاہور ( اُردو پوائنٹ اخبارتازہ ترین۔ 21 ستمبر 2025ء ) صوبہ پنجاب میں کچرا ٹھکانے لگانے کا نیا منصوبہ سامنے آگیا جس کے تحت رنگ دار کوڑے دان استعمال کرنے کا حکم دے دیا گیا، پہلے مرحلے میں سمارٹ ویسٹ مینجمنٹ پراسیس پنجاب بھر کے سرکاری و نجی تعلیمی اداروں میں نافذ کرنے کی منظوری دے دی گئی۔ تفصیلات کے مطابق صوبائی حکومت نے جاری حکم نامہ جاری کرتے ہوئے کہا ہے کہ سرکاری و نجی درس گاہوں میں پانچ رنگ کے کوڑے دان رکھے جائیں، سینئر وزیر موحولیات اینڈ کلائمٹ چینج مریم اورنگزیب منصوبے کی نگرانی کریں گی، اس حوالے سے وزیر تعلیم رانا سکندر حیات اور لوکل گورنمنٹ ذیشان ملک کو ٹارگٹس سونپ دیئے گئے۔

بتایا گیا ہے کہ 30 ستمبر تک تمام سکولوں میں رنگوں والے کوڑے دان لگانے کی ڈیڈ لائن مقرر کردی گئی، یکم اکتوبر سے معائنہ شروع ہوگا اور کوڑے دان نہ رکھنے پر جرمانے ہوں گے، اس ضمن میں ماحولیاتی تحفظ کے ادارے نے باضابطہ نوٹیفیکیشن بھی جاری کیا ہے، جس کے مطابق الگ الگ رنگ کے کچرے کے ڈبوں میں الگ الگ قسم کا ک کوڑا جمع کیا جائے گا۔

(جاری ہے)

معلوم ہوا ہے کہ پیلے رنگ کے ڈبوں میں کاغذ اور ردی جمع کی جائے گی، سبز رنگ کے ڈبوں میں بوتلیں، کانچ کے ٹکڑے اور لیبارٹری میں استعمال ہونے والا ضائع شدہ سامان ڈالا جائے گا، گرے رنگ میں پھلوں کے چھلکے، ضائع شدہ کھانا، پتے اور گلی سڑی سبزیاں پھینکی جائیں گی، لال رنگ کے کچرے کے ڈبے لوہے اور دیگر دھاتی کوڑے کیلئے استعمال ہوں گے، نارنجی ڈبے پلاسٹک ویسٹ کیلئے استعمال کیے جائیں گے اور ان اشیا کو دوبارہ استعمال کے قابل بنانے کیلئے استعمال کیا جائے گا۔