بھارت جھگڑالو پڑوسی کی بجائے اچھے ہمسائے کی طرح رہے، وزیراعظم

اگر کوئی یہ سمجھتا ہے کہ کشمیر کا مسئلہ حل کیے بغیر پاک بھارت تعلقات استوار ہو سکتے ہیں تو وہ احمقوں کی جنت میں رہتا ہے، پاکستان اور بھارت کے درمیان جنگوں پر اربوں ڈالر خرچ ہوئے جو عوام کی ترقی و فلاح پر خرچ ہونے چاہئیں؛ لندن میں خطاب

ساجد علی اتوار 21 ستمبر 2025 11:20

بھارت جھگڑالو پڑوسی کی بجائے اچھے ہمسائے کی طرح رہے، وزیراعظم

لندن ( اُردو پوائنٹ اخبارتازہ ترین۔ 21 ستمبر2025ء ) وزیراعظم شہباز شریف کا کہنا ہے کہ مسئلہ کشمیر حل کیے بغیر پاک بھارت تعلقات قائم نہیں ہو سکتے، بھارت جھگڑالو پڑوسی کی بجائے اچھے ہمسائے کی طرح رہے، غزہ میں ظلم و ستم جاری ہے، 64 ہزار فلسطینی شہید کردیئے گئے ہیں، غزہ میں فلسطینیوں کا کھانا، پینا اور ادویات بند کر دی گئیں۔ لندن میں اوورسیز کنونشن سے خطاب کرتے ہوئے انہوں نے واضح الفاظ میں کہا کہ اگر کوئی یہ سمجھتا ہے کہ کشمیر کا مسئلہ حل کیے بغیر پاک بھارت تعلقات استوار ہو سکتے ہیں تو وہ احمقوں کی جنت میں رہتا ہے، بھارت سے برابری کی بنیاد پر بات کرنا چاہتے ہیں، پاکستان اور بھارت کے درمیان جنگوں پر اربوں ڈالر خرچ ہوئے، اربوں ڈالر عوام کی ترقی و فلاح پر خرچ ہونے چاہئیں، پاکستان اور بھارت ہمسائے ہیں ہمیں ساتھ رہنا ہے لیکن مسئلہ کشمیر حل کیے بغیر پاک بھارت تعلقات قائم نہیں ہوسکتے، کشمیریوں کا خون رائیگاں نہیں جانے دیا جائے گا۔

(جاری ہے)

وزیراعظم نے برطانوی پاکستانی برادری کی خدمات کو سراہتے ہوئے کہا کہ اوورسیز پاکستانیوں کی معیشت میں معاونت ناقابلِ فراموش ہے، اوورسیز پاکستانیوں کو سونے اور جواہرات میں بھی تولا جائے تو کم ہے، اس برس اوورسیز پاکستانیوں نے ساڑھے 48 ارب ڈالر پاکستان بھیجے ہیں، برطانوی و دیگر ممالک میں مقیم پاکستانی ملک کی ترقی اور استحکام میں نمایاں کردار ادا کر رہے ہیں اور حکومت اُن کے حقوق اور تحفظ کیلئے مسلسل کوشاں ہے، عالمی فورمز پر پاکستان اپنے مؤقف کو مضبوطی سے پیش کرتا رہے گا۔