Live Updates

سروے کرانے کے بعد حکومت متاثرین کی بحالی کیلئے جامع پروگرام کا اعلان جلد کریگی‘کاظم علی پیرزادہ

حالیہ سیلاب ملکی تاریخ کا بدترین سیلاب تھا وزیر اعلی مریم نواز خود بھی زدگان کے دکھ درد میں شریک ہیں ‘صوبائی وزیر آبپاشی

پیر 22 ستمبر 2025 20:10

لاہور (اُردو پوائنٹ اخبارتازہ ترین - این این آئی۔ 22 ستمبر2025ء)صوبائی وزیر آبپاشی کاظم علی پیر زادہ نے کہا ہے کہ وزیر اعلی مریم نواز شریف کی قیادت میں حکومت پنجاب سیلاب سے متاثرہ علاقوں میں ریسکیو اینڈ ریلیف کے لیے تمام وسائل بروئے کار لا رہی ہے ، جن علاقوں میں سیلاب موجود ہے وہاں ریسکیو اینڈ ریلیف کا عمل جاری ہے جبکہ جہاں سے پانی اتر گیا نقصانات کا سروے کرانے کے بعد حکومت متاثرین کی بحالی کے لیے جامع پروگرام کا اعلان جلد کرے گی۔

ان خیالات کا اظہار انہوں نے تحصیل خیر پور ٹامیوالی کے سیلاب سے مختلف علاقوں کے دورہ کے موقع پر کیا، صوبائی وزیر آبپاشی گزشتہ روز وزیر اعلی پنجاب کے دورہ بہاولنگر کے موقع پر بھی موجود رہے اور محکمہ آبپاشی کی طرف سے اس جاری اقدامات بارے بریفننگ دی ، وزیر اعلی پنجاب نے صوبائی وزیر اریگیشن اور انکی ٹیم کی کارکردگی کو زبردست سراہا ۔

(جاری ہے)

صوبائی وزیر آبپاشی کاظم علی پیر زادہ نے کہا کہ حالیہ سیلاب ملکی تاریخ کا بدترین سیلاب تھا جس سے صوبہ بھر میں بھاری نقصان ہوا ہے تاہم محکمہ انہار کے انجینئرز اور سٹاف نے چناب، راوی، ستلج میں طغیانی کے دوران دن رات کام کیا، شہریوں کے جان و مال اور اریگیشن سٹرکچرز کو محفوظ رکھنے کے لیے پیشہ ورانہ انداز میں دن رات کام کیا ۔ صوبائی وزیر آبپاشی کاظم علی پیر زادہ نے کہا کہ وزیر اعلی پنجاب مریم نواز شریف خود بھی سیلاب زدگان کے دکھ درد میں شریک ہیں اور سینئر صوبائی وزیر مریم اورنگزیب کی قیادت میں صوبائی وزرا کی ٹیم کو متاثرہ علاقوں میں ریسکیو اینڈ ریلیف آپریشنز کی نگرانی کے لیے مامور کر رکھا ہے ۔

صوبائی وزیر نے کہا کہ متاثرین کی ریسکیو اینڈ ریلیف کیساتھ جن علاقوں سے پانی اتر چکا ہے وہاں نقصانات کا تخمینہ اور متاثرین کی بحالی حکومت پنجاب کی اولین ترجیح ہے ۔