اگر پاکستان کیخلاف سمندر کے راستے کوئی شرپسندی یا جارحیت ہوئی تو نتائج کی ذمہ داری بھارت کے کندھوں پر ہوگی

بھارت کو اس بارے میں کوئی ابہام نہیں رہنا چاہیےکہ پاکستان کا ردِعمل فوری اور غیرمتوقع اور مؤثر ہوگا، سابق چیئرمین جوائنٹ چیفس آف اسٹاف کمیٹی جنرل(ر) زبیر محمود حیات کا پاکستان نیوی وار کالج میں کانفرنس سے خطاب

ثنااللہ ناگرہ جمعرات 25 ستمبر 2025 19:55

اگر پاکستان کیخلاف سمندر کے راستے کوئی شرپسندی یا جارحیت ہوئی تو نتائج ..

لاہور (اردوپوائنٹ اخبارتازہ ترین۔ انٹرنیشنل پریس ایجنسی۔ 25 ستمبر 2025 ) سابق چیئرمین جوائنٹ چیفس آف اسٹاف کمیٹی جنرل(ر) زبیر محمود حیات نے کہا ہے کہ کسی بھی جارحیت پر بھارت کو کوئی ابہام نہیں رہنا چاہیے کہ پاکستان کا ردِعمل فوری اور غیرمتوقع اور مؤثر ہوگا۔ تفصیلات کے مطابق میری ٹائم سینٹر آف ایکسیلینس (MCE) کے زیرِ اہتمام ’’بحرِ ہند کے خطے میں اسٹریٹیجک صف بندی: ایک سال بعد بدلتے رجحانات کا جائزہ‘‘ کے موضوع پر دوسری کانفرنس پاکستان نیوی وار کالج، لاہور میں منعقد ہوئی۔

کانفرنس میں بحرِ ہند کے بدلتے اسٹریٹیجک منظرنامے، بڑی طاقتوں کے درمیان بڑھتی کشیدگی، ابھرتی ٹیکنالوجی کے اثرات اور پاکستان کی لچکدار حکمتِ عملیوں پر غور کیا گیا۔ سابق چیئرمین جوائنٹ چیفس آف اسٹاف کمیٹی جنرل زبیر محمود حیات (ریٹائرڈ) نے خطاب کرتے ہوئے کہا کہ اگر پاکستان کے خلاف سمندر کی سمت سے کوئی شرپسندی یا جارحیت کی گئی یا اس کی منصوبہ بندی ہوئی تو اس کے نتائج کی ذمہ داری براہِ راست بھارت کے کندھوں پر ہوگی۔

(جاری ہے)

اس بارے میں کوئی ابہام نہیں رہنا چاہیے؛ پاکستان کا ردِعمل فوری، غیر متوقع اور مؤثر ہوگا۔ سابق وزیرِ خارجہ حنا ربانی کھر نے بحرِ ہند میں ابھرتے ہوئے سمندری چیلنجز پر بات کرتے ہوئے سفارتی بصیرت، علاقائی تعاون اور کثیرالجہتی تعاون کی اہمیت پر زور دیا۔

قبل ازیں، صدر MCE اور کمانڈنٹ پاکستان نیوی وار کالج ریئر ایڈمرل سہیل احمد عزمی نے ابتدائی کلمات میں معزز مہمانوں کو خوش آمدید کہا اور بحرِ ہند کے خطے کی اسٹریٹیجک اہمیت، اور بین الاقوامی تنازعات کے تناظر میں موجودہ چیلنجز پر روشنی ڈالی۔

دیگر مقررین میں مشیر نیشنل کمانڈ اتھارٹی اور سابق ڈی جی اسٹریٹیجک پلان ڈویژن کے لیفٹیننٹ جنرل خالد احمد کدوائی (ریٹائرڈ)؛ سابق سیکریٹری خارجہ پاکستان اعزاز احمد چوہدری؛ وائس ایڈمرل خان حشام بن صدیق (ریٹائرڈ)؛ صدر نیشنل انسٹی ٹیوٹ آف میری ٹائم افیئرز وائس ایڈمرل احمد سعید (ریٹائرڈ)؛ صدر سینٹر فار ایروسپیس اینڈ سیکیورٹی اسٹڈیز اسلام آباد ایئر مارشل جاوید احمد (ریٹائرڈ)؛ ڈائریکٹر ایکسٹرنل لنکیجز قائداعظم یونیورسٹی ڈاکٹر سلمہ ملک؛ ریئر ایڈمرل سید فیصل علی شاہ (ریٹائرڈ)؛ اور ایگزیکٹو ڈائریکٹر اسٹریٹیجک ویژن انسٹیٹیوٹ بریگیڈیئر ڈاکٹر نعیم سالک (ریٹائرڈ) شامل تھے۔

کانفرنس میں معروف سفارتکاروں، دفاعی ماہرین، میڈیا کے نمائندگان، اسکالرز اور بڑی تعداد میں یونیورسٹی کے طلبہ و طالبات نے شرکت کی۔