محکمہ زراعت آزاد کشمیر کے زیر اہتمام جلال آباد پارک میں زرعی نمائش

منگل 23 ستمبر 2025 17:35

مظفرآباد (اُردو پوائنٹ اخبارتازہ ترین - اے پی پی۔ 23 ستمبر2025ء) محکمہ زراعت آزاد کشمیر کے زیر اہتمام جلال آباد پارک میں ’’زرعی نمائش 2025‘‘ کا انعقاد کیا گیا۔ سپیکر قانون ساز اسمبلی چوہدری لطیف اکبر نے زرعی اجناس کے سٹالز کا دوہ کیا جن میں سبزیاں، پھل، فصلوں کی مختلف اقسام ، بیج، ادویات اور مشینری کے سٹالز شامل تھے اور مقامی زمینداروں کی حوصلہ افزائی کی۔

اس موقع پر سپیکر قانون ساز اسمبلی نے میڈیا سے گفتگو کرتے ہوئے کہا کہ محکمہ زراعت کی جانب سے اس طرح کی زرعی نمائش کا انعقاد خوش آئند ہے۔ اس سے مقامی فارمرز کو ایک دوسرے کے تجربات سے استعفادہ کرنے میں مدد ملے گی۔ انہوں نے کہا کہ اس وقت ہمارے خطے کو ماحولیاتی تبدیلیوں کے بڑے چیلنجز کا سامنا ہے۔

(جاری ہے)

ہم زراعت کے شعبے پر توجہ دے کر ان چیلنجز سے نبرد آزما ہو سکتے ہیں۔

سپیکر قانون ساز اسمبلی نے کہا کہ ہمارے مختلف اقسام کے پھل، سبزیاں اور فصلیں اب ناپید ہوتی جا رہی ہیں جن کو بچانے کی ضرورت ہے۔ محکمہ زراعت مقامی فارمرز کے ساتھ مل کر اقدامات کرے۔اس موقع پر سیکرٹری برقیات ارشاد احمد قریشی، سیکرٹری ماحولیات عامر محمود مرزا، ناظم زراعت ملک محمد عامر، ناظم تعلقات عامہ محمد بشیر مرزا، ناظم زراعت توسیع آمنہ رفیع سمیت محکمہ زراعت کے افسران نے بھی سٹالز کا معائنہ کیا۔

زرعی نمائش میں آزاد کشمیر کے تمام اضلاع مظفرآباد، نیلم، جہلم ویلی، باغ، پونچھ ، باغ ، حویلی، سدھنوتی، میرپور، کوٹلی اور بھمبر کے دور دراز علاقوں سے کسانوں نے حصہ لیا اور اپنی اپنی زرعی اجناس کے سٹالز لگائے۔ زرعی نمائش کا مقصد آزاد کشمیر کو زرعی اجناس کی پیداوار میں خود کفیل بنانا تھا۔ اس موقع پر شہریوں/ کسانوں کی کثیر تعداد کو ماہرین زراعت کے علم و تجربہ سے مستفید ہونے کا موقع ملا۔