پنجاب کے میڈیکل کالجز میں داخلے کیلئے پالیسی منظور، ایم ڈی کیٹ ٹیسٹ پاس کرنا لازمی قرار

لاہور ( اُردو پوائنٹ اخبارتازہ ترین۔ 26 ستمبر2025ء ) پنجاب کے میڈیکل کالجز میں داخلے کیلئے پالیسی منظور کرتے ہوئے ایم ڈی کیٹ ٹیسٹ پاس کرنا لازمی قرار دے دیا گیا۔ تفصیلات کے مطابق پنجاب کے پبلک اور پرائیویٹ میڈیکل اینڈ ڈینٹل کالجز میں داخلے کیلئے نئی ایڈمیشن پالیسی منظور کی گئی ہے، اس حوالے سے وزیراعلیٰ پنجاب مریم نواز کی زیر صدارت اجلاس ہوا، جس میں محکمہ صحت سے متعلق کئی فیصلے کیے گئے، اسی دوران اجلاس میں صوبے کے پبلک اور پرائیویٹ میڈیکل اینڈ ڈینٹل کالجز کے لیے ایڈمیشن پالیسی کی منظوری بھی دی گئی۔

بتایا گیا ہے کہ پالیس کے تحت سرکاری میڈیکل کالجز میں داخلے کے لیے ایم ڈی کیٹ ٹیسٹ پاس کرنا لازمی قرار دیا گیا ہے، اوورسیز پاکستانیزکے بچوں کے لیے ایم ڈی کیٹ میں 10 ہزار ڈالر فیس مقرر کرنے کا فیصلہ کیا گیا، نجی میڈیکل کالج کی لسٹ میں نام آنے پر امیدوار کو یونیورسٹی آف ہیلتھ سائنسز (یو ایچ ایس) میں ایک تہائی فیس جمع کرانا ہوگی، نجی کالجز کی حتمی میرٹ لسٹ آنے کے بعد یو ایچ ایس کالج کو جمع شدہ ایک تہائی فیس ٹرانسفر کر دے گی، طلباء حتمی میرٹ لسٹ آنے پر متعلقہ پرائیویٹ میڈیکل اینڈ ڈینٹل کالج میں ہی باقی فیس جمع کرائیں گے۔

(جاری ہے)

معلوم ہوا ہے کہ اجلاس میں پرائیویٹ ہسپتالوں میں پوسٹ گریجویٹ ٹریننگ کے بعد لازمی سروس کی باہمی تجویز پر بھی اتفاق کیا گیا اور یہ فیصلہ ہوا کہ ٹرینی ڈاکٹر کو پرائیویٹ میڈیکل کالجز کے متعلقہ شعبے میں سپیشلائزیشن کے لیے بھیجا جائے گا، اس موقع پر وزیراعلیٰ پنجاب نے ساہیوال میں پہلی کامیاب انجیو پلاسٹی پر اطمینان کا اظہار کیا اور میو ہسپتال لاہور کوابلیشن سینٹر میں علاج کے لیے فول پروف اور شفاف طریقہ کار وضع کرنے کی ہدایت کی گئی، اجلاس میں نئے میڈیکل کالج کی الگ بلڈنگ بنانے کے بجائے سرکاری یونیورسٹیوں میں میڈیکل بلاک بنانے کی تجویز پر اتفاق کیا گیا۔

بتایا جارہا ہے کہ وزیراعلیٰ پنجاب نے صوبے کے مختلف اداروں کے بورڈ آف منیجمنٹ کی منظوری بھی دی، اجلاس میں خطاب کرتے ہوئے انہوں نے کہا کہ پنجاب کے ہر اسپتال میں غریب مریض کو روپیہ خرچ کیے بغیر علاج کی سہولت ملنی چاہیے، چاہتی ہوں کہ کینسر کے ہر مریض کا علاج ممکن بنایا جائے، نواز شریف میڈیکل سٹی کے جلد قیام کے حوالے سے بھی ضروری اقدامات کرنے کی ہدایت کردی ہے۔