کمشنر پنجاب سوشل سکیورٹی محمد علی کی زیر صدارت ہیڈ آفس میں ایک اہم اجلاس

جمعہ 26 ستمبر 2025 16:31

لاہور (اُردو پوائنٹ اخبارتازہ ترین - این این آئی۔ 26 ستمبر2025ء)کمشنر پنجاب سوشل سکیورٹی محمد علی کی زیر صدارت ہیڈ آفس میں ایک اہم اجلاس منعقد ہوا جس میں سوشل سکیورٹی ہسپتال فیصل آباد، ڈائریکٹوریٹ ایسٹ اور ویسٹ کی کارکردگی کا تفصیلی جائزہ لیا گیا۔ اجلاس میں متعلقہ میڈیکل سپرنٹنڈنٹٹ اور ڈائریکٹرز نے آن لائن شرکت کی۔ کمشنر نے فیصل آباد ہسپتال میں کنسلٹنٹ کی خالی آسامیوں کو فوری طور پر پر کرنے اور ڈائریکٹر ایم سی کو فوری اقدامات کرنے کی ہدایت دی۔

اسی طرح آنکھوں کے بروقت آپریشن کے لیے جدید فیکو مشین کو نواز شریف ہسپتال لاہور، ملتان، سرگودھا اور فیصل آباد ہسپتال کے درمیان منتقل کرنے کی ہدایت جاری کی گئی۔ فیصل آباد ہسپتال کے حوالے سے کمشنر نے ڈائریکٹر ورکس کو ہسپتال کا معائنہ کر کے رنگ و روغن اور مرمتی کاموں کی تفصیلی رپورٹ پیش کرنے کی ہدایت دی جبکہ صفائی کے عملے کی خالی آسامیوں کو قواعد و ضوابط اور پپرا رولز کے تحت آؤٹ سورس کرنے کی ہدایت بھی کی۔

(جاری ہے)

اجلاس میں سوشل سکیورٹی ڈسپنسری سمندری میں سہولیات کے کم استعمال پر کمشنر نے تشویش کا اظہار کرتے ہوئے ڈائریکٹر میڈیکل ایسٹ سے شفٹنگ، ضم یا ڈاؤن گریڈنگ کی تجاویز طلب کیں۔ کمشنر نے ڈائریکٹر میڈیکل ویسٹ کو تمام شکایتی بکس ایک ہی ڈیزائن اور نمونے میں تیار کرنے اور رپورٹ ہیڈ آفس میں جمع کرانے کا حکم دیا۔ مزید برآں، کرائے اور کرایہ فری عمارتوں کی مرمت کے تخمینے تیار کر کے آئندہ گورننگ باڈی اجلاس میں پیش کرنے اور تمام ہسپتالوں و میڈیکل آؤٹ لیٹس کے سائن بورڈز ایک ہی ڈیزائن اور رنگ میں تیار کرنے کی بھی ہدایت دی گئی۔ کمشنر پنجاب سوشل سکیورٹی محمد علی نے واضح کیا کہ محنت کشوں کو جدید علاج و معالجہ کی سہولیات کی فراہمی محکمہ کی اولین ترجیح ہے۔