الیکشن کمیشن کا اجلاس،پنجاب میں لوکل گورنمنٹ انتخابات کے انعقاد کا کیس 8اکتوبر کو سماعت کیلئے مقرر

اسلام آباد (اُردو پوائنٹ اخبارتازہ ترین - اے پی پی۔ 30 ستمبر2025ء) الیکشن کمیشن نے صوبہ پنجاب میں بلدیاتی انتخابات کے انعقاد کی تیاریوں کی صورتحال پر مایوسی کا اظہار کرتے ہوئے صوبہ میں لوکل گورنمنٹ انتخابات کے انعقادکے کیس کو 8اکتوبر 2025 کو سماعت کیلئے مقرر کر دیا اور سیکرٹری لوکل گورنمنٹ پنجاب کو ذاتی حیثیت میں طلب کیا ہے، اس کیس کی سماعت الیکشن کمیشن کا فل بنچ کرے گا۔

الیکشن کمیشن کی جانب سے جاری بیان کے مطابق صوبہ پنجاب میں مقامی حکومتوں کے انتخابات کے انعقاد کے سلسلے میں الیکشن کمیشن کا اہم اجلاس چیف الیکشن کمشنر سکندر سلطان راجہ کی سربراہی میں منعقد ہوا۔اجلاس میں ممبران الیکشن کمیشن، سیکرٹری الیکشن کمیشن اور دیگر سینئرافسران نے شرکت کی۔

(جاری ہے)

سیکرٹری الیکشن کمیشن نے اجلاس کو بتایا کہ پنجاب میں مقامی حکومتوں کی میعاد 2021میں ختم ہوگئی تھی۔

سابقہ ادوار میں پانچ مرتبہ لوکل گورنمنٹ قوانین میں ترامیم کی گئیں۔ الیکشن کمیشن تین دفعہ حلقہ بندی کرچکا ہے۔ الیکٹورل گروپس کی رجسٹریشن بھی 2دفعہ کرچکا ہےاور اب چھٹی مرتبہ قانون سازی پر کام جاری ہے۔اس سلسلے میں الیکشن کمیشن کئی مرتبہ پنجاب حکومت کو مراسلہ جات تحریرکر چکا ہےاور اجلاس کر چکا ہے۔ اس کے باوجود صوبہ میں قانون سازی اور لوکل گورنمنٹ انتخابات کا انعقاد ممکن نہیں ہوسکا۔

سیکرٹری نے مزید بتایا کہ الیکشن کمیشن نے صوبہ میں انتخابات کے انعقاد کو یقینی بنانے کیلئے اس کیس کی سماعت 2جون 2025 کو کی جس میں صوبہ پنجاب کی طرف سے مقامی حکومت کے صوبائی وزیراور سیکرٹری لوکل گورنمنٹ پنجاب الیکشن کمیشن میں پیش ہوئے اور موقف اختیار کیا کہ مقامی حکومت کے مسودہ قانون پر قائمہ کمیٹی جائزہ لے رہی ہے ۔مزید گورنمنٹ آف پنجاب بجٹ سیشن میں مصروف ہے۔

حکومت کو تین ماہ کا مزید وقت دیا جائے تاکہ قانون سازی مکمل کی جائے۔الیکشن کمیشن نے اپنے حکم میں حکومت پنجاب کی درخواست پر تین ماہ کا وقت دیا تھا لیکن اب تک پنجاب حکومت کی طرف سے قانون سازی سے متعلق کوئی پیشرفت کی اطلاع موصول نہیں ہوئی ہے۔الیکشن کمیشن نے اس صورتحال پر انتہائی مایوسی کا اظہار کیا اور صوبہ میں لوکل گورنمنٹ انتخابات کے انعقاد کے کیس کو 8اکتوبر 2025 کو سماعت کیلئے مقرر کیا اور سیکرٹری لوکل گورنمنٹ پنجاب کو ذاتی حیثیت میں طلب کیا ہے۔ اس کیس کی سماعت الیکشن کمیشن کا فل بنچ کرے گا۔