ٰضلع اٹک میں ٹریفک کے معاملات بہتربنانے کے لیے تمام وسائل بروئے کار لائے جائیں گے،راؤ عاطف رضا

اٹک (اُردو پوائنٹ اخبارتازہ ترین - آن لائن۔ 30 ستمبر2025ء) ڈپٹی کمشنر وچیئرمین ریجنل ٹرانسپورٹ اتھارٹی اٹک راؤ عاطف رضا نے کہا ہے کہ ضلع اٹک میں ٹریفک کے معاملات بہتربنانے کے لیے تمام وسائل بروئے کار لائے جائیں گے،چنگ چی رکشوں کی پارکنگ کے مسائل حل کیے جائیں گے اورغیر رجسٹرڈ چنگ چی رکشوں کے خلاف سخت ترین قانونی کاروائی عمل میں لائی جائے گی،انہوں نے ان خیالات کا اظہار ریجنل ٹرانسپورٹ اتھارٹی اٹک کے اجلاس کی صدارت کرتے ہوئے کیا،اجلاس میں ایڈیشنل ڈپٹی کمشنر جنرل انیل سعید، سیکرٹری ریجنل ٹرانسپورٹ اتھارٹی اٹک سردار ظہیر احمد خان،ضلعی ٹریفک آفیسر مرزا خرم،چیف افسران اور دیگر متعلقہ اداروں کے افراد بھی موجود تھے،سیکرٹری ریجنل ٹرانسپورٹ اتھارٹی اٹک ظہیر احمد خان نے بریفنگ دی،اجلاس میں روڈ سیفٹی اور حادثات،کمرشل گاڑیوں کی فٹنس،ایکسل لوڈ مینجمنٹ کے حوالے سے کاروائیوں کا جائزہ،اوور لوڈنگ اور اوور چارجنگ، کمرشل گاڑیوں میں ایل پی جی سلنڈر کے استعمال،شمسی توانائی پر چلنے والے ٹریفک سگنلز کی تنصیب،رکشوں کی رجسٹریشن،کمرشل گاڑیوں کاوزن کرنے والیپوائنٹس(کانٹی) کی ڈیجیٹلائزیشن، ایکسپائرروٹ والی کمرشل گاڑیوں کے خلاف کاروائی،وزیر اعلی پنجاب مریم نواز شریف کی ہدایت پر ضلع اٹک میں جلدشروع ہونے والی الیکٹرک بسوں کا ڈیٹا اورلاری اڈوں کے حالات کا جائزہ لیا گیا اور اس ضمن میں اہم فیصلے کیے گئے،ڈپٹی کمشنر اٹک نے کہا کہ ضلع اٹک میں ٹریفک کے مسائل کے سلسلے میں وہ بخوبی آگاہ ہیں اور اس سلسلے میں ایک مربوط حکمت عملی مرتب کی جا رہی ہے،اس کے علاوہ کمرشل گاڑیوں میں مسافروں سے اوور چارجنگ کرنے والوں کے خلاف بھی قانونی کاروائی جاری ہے،ایکسل لوڈ مینجمنٹ کے حوالے سے ڈپٹی کمشنر اٹک نے محکمہ معدنیات کو ہدایات جاری کیں کہ لیز ایریاز میں زائد وزن کو کنٹرول کیا جائے،معدنیات بشمول بجری ریت کے وزن کو کنٹرول کیا جائے،اور تمام محکموں کو ہدایات جاری کیں کہ دوسرے صوبوں سے آنے والی گاڑیوں کی بھی چیکنگ کی جائے اور زائد وزن والی گاڑیوں کے خلاف سخت کارروائی کی جائے، انہوں نے متعلقہ افسران کو سخت ہدایات جاری کرتے ہوئے کہا کہ اجلاس میں ہونے والے ہیں اہم فیصلوں پر سختی سے عمل درآمد کروایا جائے اور ان فیصلوں کی خلاف ورزی کرنے والوں کے خلاف بلا تفریق قانونی کاروائی عمل میں لائی جائی