اپنی لکھائی ٹھیک کریں،بھارتی عدالت نے ڈاکٹرز کوحکم

ڈاکٹرز اپنی لکھائی کو بہتر بنائیں تاکہ اسے آسانی سے پڑھا جاسکے،پنجاب،ہریانہ ہائیکورٹس

بدھ 1 اکتوبر 2025 14:35

نئی دہلی(اُردو پوائنٹ اخبارتازہ ترین - این این آئی۔ 01 اکتوبر2025ء) بھارت کی ایک عدالت نے ڈاکٹرز کو حکم دیا ہے کہ وہ اپنی ہینڈ رائٹرنگ کو بہتر کریں تاکہ طبی نسخوں کو آسانی سے پڑھا جاسکے۔ برطانوی نشریاتی ادارے کی رپورٹ کے مطابق بھارت میں پنجاب اور ہریانہ ہائیکورٹ کی جانب سے ایک کیس کے دوران یہ حکم دیا گیا کہ ڈاکٹرز اپنی لکھائی کو بہتر بنائیں تاکہ اسے آسانی سے پڑھا جاسکے۔

رپورٹ کے مطابق یہ حکام نامہ ایک دوسرے کیس کے دوران سامنے آیا جس میں ایک خاتون کی طرف سے مرد پر جنسی زیادتی، دھوکا دہی اور جعل سازی کے الزامات لگائے گئے تھے اور عدالت میں جج اس کیس میں نامزد ملزم کی درخواست ضمانت پر سماعت کررہے تھے۔ سماعت کے دوران جب جج نے جنسی زیادتی سے متعلق پیش کی گئی سرکاری ڈاکٹر کی بنائی گئی میڈیکو لیگل رپورٹ دیکھی تو وہ ناقابل فہم تھی کیونکہ اسے پڑھا نہیں جاسکتا تھا۔

(جاری ہے)

اس موقع پر جج نے ریمارکس دیے کہ یہ عدالت کا ضمیر جھنجھوڑ دینے والی بات ہے کہ اس رپورٹ کا ایک بھی حرف یا لفظ پڑھنے کے قابل نہیں تھا۔عدالت نے کہا کہ آج کے دور میں جب ٹیکنالوجی اور کمپیوٹر ہر جگہ دستیاب ہیں تو یہ بات باعث حیرت ہے کہ سرکاری ڈاکٹرز آج بھی ہاتھ سے ایسے نسخے لکھ رہے ہیں جسے صرف کچھ کیمسٹ ہی پڑھ سکتے ہیں۔ عدالت نے حکومت کو حکم دیا کہ میڈیکل کالجوں کے نصاب میں خوشخطی کی تربیت شامل کی جائے اور 2 سال کے اندر نسخے لکھنے کے نظام کو ڈیجیٹلائز کیا جائے۔