سموگ کے خاتمے کیلئے محکمہ داخلہ پنجاب کا اہم اقدام

بدھ 1 اکتوبر 2025 17:31

لاہور (اُردو پوائنٹ اخبارتازہ ترین - این این آئی۔ 01 اکتوبر2025ء) سموگ کے خاتمے کیلئے محکمہ داخلہ پنجاب کا اہم اقدام،60ہزار سے زائد افراد نے بطور سول ڈیفنس رضاکار رجسٹریشن کروا لی ہے۔ سول ڈیفنس پنجاب کے رضاکار سموگ کے خلاف آگاہی مہم اور آپریشن میں مدد کریں گے۔ اسی حوالے سے محکمہ داخلہ میں پنجاب چیریٹیز کمیشن، سول ڈیفنس اور محکمہ ماحولیات کے اشتراک سے خصوصی اجلاس منعقد ہوا جس میں پنجاب بھر میں ماحول کے تحفظ کیلئے سرگرم تنظیموں کے نمائندگان نے شرکت کی۔

اجلاس میں سموگ کے خلاف آگاہی پھیلانے اور فیلڈ آپریشنز میں مدد بارے مربوط و منظم لائحہ عمل طے کیا گیا۔ ترجمان محکمہ داخلہ پنجاب کے مطابق سموگ و دیگر آفات یا ہنگامی صورتحال سے نمٹنے کیلئے بڑی تعداد میں شہری سول ڈیفنس کیساتھ بطور رضاکار رجسٹریشن کروا رہے ہیں۔

(جاری ہے)

مردوں کے شانہ بشانہ خواتین بھی اس قومی فریضے کو سرانجام دے رہی ہیں اور اب تک 37,532مرد جبکہ 23,314خواتین نے بطور سول ڈیفنس رضاکار رجسٹریشن کروا لی ہے۔

پنجاب کے اضلاع کی بات کی جائے تو رجسٹریشن میں گوجرانولہ پہلے، جہلم دوسرے اور فیصل آباد تیسرے نمبر پر آ گیا ہے۔ ترجمان محکمہ داخلہ پنجاب کے مطابق تمام شعبہ ہائے زندگی سے تعلق رکھنے والے اور مختلف تعلیمی قابلیت کے افراد رجسٹریشن کروا رہے ہیں۔ انہوں نے بتایا کہ سول ڈیفنس رضاکار ہر قسم کے ہنگامی حالات میں متاثرین کی امداد کرتے ہیں۔

پاکستانیوں نے ہمیشہ مشکل کی گھڑی میں خود کو ایک باوقار اور متحد قوم ثابت کیا ہے۔ اب بھی جذبہ ایثار اور خدمت سے لبریز نوجوان بڑی تعداد میں رجسٹریشن کروا رہے ہیں۔ ترجمان نے بتایا کہ بطور رضاکار خدمات سرانجام دینے والوں کو خصوصی تعریفی اسناد دی جائیں گی۔ یاد رہے کہ سول ڈیفنس میں بطور رضاکار رجسٹریشن کیلئے محکمہ داخلہ پنجاب کا آن لائن پورٹل VCD.HOME.GOP.PK اب بھی کھلا ہے۔ رجسٹریشن کروانے پر متعلقہ اضلاع میں سول ڈیفنس انتظامیہ شہریوں سے خود رابطہ کر رہی ہے۔

Facebook Twitter Google + Share on Whatsapp

سموگ کے خاتمے کیلئے محکمہ داخلہ پنجاب کا اہم اقدام

متعلقہ عنوان :

مزید قومی خبریں