عمران خان دور میں جیلیٹ ”پراکٹر اینڈ گیمبل“ نے پاکستان میں 50ملین ڈالرز کی سرمایہ کاری کی تھی

لاہور ( اُردو پوائنٹ اخبارتازہ ترین۔ 02 اکتوبر2025ء ) پراکٹر اینڈ گیمبل کے آپریشنز کی بندش پر تحریک انصاف نے ردعمل دیتے ہوئے کہا ہے کہ ‏آج سے چھ سال قبل عمران خان دور حکومت میں جیلیٹ ”پراکٹر اینڈ گیمبل“ نے پاکستان میں 50ملین ڈالرز کی سرمایہ کاری کی , کراچی کے علاقے پورٹ قاسم میں بالوں کی حفاظت کا انتہائی جدید ترین پلانٹ قائم کیا گیا - آج مینڈیٹ چور کرپٹ اور نااہل حکمرانوں کی ناقص پالیسیوں کی بدولت اس کمپنی نے بھی پاکستان میں اپنی پروڈکشن روک دی ہے۔

واضح رہے کہ معروف ملٹی نیشنل کمپنی پراکٹر اینڈ گیمبل (P&G) نے پاکستان میں آپریشن بند کرنے کا اعلان کردیا۔ پروپاکستانی کے مطابق عالمی کمپنی پراکٹر اینڈ گیمبل (P&G) نے اعلان کیا ہے کہ وہ جیلٹ پاکستان سمیت یہاں اپنے مینوفیکچرنگ اور کمرشل آپریشنز کو ختم کردے گی، کمپنی اس کے بجائے پاکستانی صارفین کی خدمت جاری رکھنے کے لیے تھرڈ پارٹی ڈسٹری بیوٹر ماڈل پر چلے گی، یہ فیصلہ ترقی کو تیز کرنے اور مزید قدر پیدا کرنے کے لیے کمپنی کی عالمی حکمت عملی کا حصہ ہے۔

(جاری ہے)

کمپنی کا کہنا ہے کہ پاکستان میں اس وقت تک معمول کے کاروبار کو جاری رکھا جائے گا جب تک کہ منتقلی مکمل نہیں ہو جاتی، اس عمل میں کئی ماہ بھی لگ سکتے ہیں، تاہم منتقلی کی منصوبہ بندی فوری طور پر شروع ہو جائے گی جس میں بنیادی توجہ اپنے ملازمین کی مدد پر مرکوز ہے، وہ عملہ جن کے کردار متاثر ہوں گے انہیں پاکستان سے باہر کمپنی کے دیگر آپریشنز میں مواقع کے لیے غور کیا جائے گا یا وہ مقامی قوانین اور کمپنی کی پالیسیوں کے مطابق علیحدگی کے پیکج حاصل کریں گے۔

بتایا گیا ہے کہ کئی آپشنز کا جائزہ لینے کے بعد P&G نے نتیجہ اخذ کیا کہ تھرڈ پارٹی ڈسٹری بیوٹر کے ساتھ کام کرنا اس کی مصنوعات کو پاکستان میں دستیاب رکھنے کا سب سے زیادہ عملی طریقہ ہے، کمپنی نے اپنے ملازمین، شراکت داروں اور صارفین کا گزشتہ برسوں کے دوران تعاون کے لیے شکریہ ادا کرتے ہوئے کہا کہ ’ان تمام سالوں میں آپ کی مدد کے لیے آپ کا شکریہ جس نے پاکستان میں P&G کو جہاں تک ہم کر سکتے تھے لے جانے میں ہماری مدد کی ہے‘۔

معلوم ہوا ہے کہ جیلیٹ ایل ایل سی نے جیلیٹ پاکستان لمیٹیڈ اور اس کے بورڈ آف ڈائریکٹرز کو پراکٹر اینڈ گیمبل کے پاکستان میں اپنے کاروباری آپریشنز کو عالمی تنظیم نو کی حکمت عملی کے تحت بند کرنے کے فیصلے کے بارے میں باضابطہ طور پر مطلع کیا ہے جس کا مقصد ترقی اور قدر کی تخلیق کو تیز کرنا ہے، کمپنی نے پاکستان سٹاک ایکسچینج (PSX) کو ایک نوٹیفکیشن میں کہا کہ جیلیٹ پاکستان لمیٹید جلد ہی ملک میں اپنے کاروبار کو ختم کرنے کے لیے ضروری اقدامات کا جائزہ لینے کے لیے بورڈ کا اجلاس بلائے گا۔

نوٹیفکیشن میں مزید کہا گیا کہ اس جائزے میں ضرورت پڑنے پر پاکستان سٹاک ایکسچینج سے جیلیٹ پاکستان لمیٹیڈ کی ممکنہ ڈی لسٹنگ شامل ہوگی، اس بات کو یقینی بناتے ہوئے کہ تمام اقدامات متعلقہ قانونی اور ریگولیٹری تقاضوں کی تعمیل کرتے ہیں، پی اینڈ جی کی مصنوعات پاکستان میں دستیاب رہیں گی لیکن اب ان کی فراہمی کمپنی کی طرف سے براہ راست مینوفیکچرنگ اور فروخت کی بجائے علاقائی آپریشنز اور مقامی تقسیم کاروں کے ذریعے کی جائے گی۔