Live Updates

پیپلزپارٹی سندھ میں اپنے 17 سالہ دور حکومت میں 17 منصوبے گنوا کر دکھائے؟

مریم نواز نے ڈیڑھ سال میں 90 منصوبے شروع کئے، لاہوریوں کی ہی نہیں بلکہ کراچی والوں کی زبان پر بھی لاہور کی سڑکوں اور صفائی کی تعریف ہے، وزیراطلاعات عظمٰی بخاری کا شرمیلا فاروقی کو چیلنج

ثنااللہ ناگرہ جمعرات 2 اکتوبر 2025 18:57

پیپلزپارٹی سندھ میں اپنے 17 سالہ دور حکومت میں 17 منصوبے گنوا کر دکھائے؟

لاہور( اردوپوائنٹ اخبار تازہ ترین۔ انٹرنیشنل پریس ایجنسی۔ 02 اکتوبر 2025ء ) وزیراطلاعات و ثقافت پنجاب عظمٰی بخاری نے شرمیلا فاروقی کے بیانات پر سخت ردعمل دیتے ہوئے کہا کہ پیپلز پارٹی سندھ میں 17 سالہ دور حکومت کے باوجود 17 عوامی فلاحی منصوبے بھی نہیں گنوا سکتی، جبکہ وزیراعلیٰ پنجاب مریم نواز نے صرف ڈیڑھ سال میں 90 منصوبے شروع کیے جن میں سے 50 مکمل ہو چکے ہیں۔

انہوں نے کہا کہ مریم نواز نے عوامی خدمت کے کئی انقلابی منصوبے متعارف کرائے ہیں جن میں اپنی چھت اپنا گھر اسکیم کے تحت 90 ہزار گھر، 80 ہزار اسکالرشپس، کسانوں میں ساڑھے 9 ہزار ٹریکٹرز کی تقسیم، طلبہ کو 27 ہزار الیکٹرک بائیکس اور جدید ترین لیپ ٹاپس کی فراہمی شامل ہیں۔ اس کے ساتھ ساتھ ہزار بیڈ کا کینسر ہسپتال، کارڈیالوجی ہسپتال، الیکٹرک بسیں اور مفت ادویات کی سہولت بھی پنجاب کے عوام کے لیے دی جا رہی ہے۔

(جاری ہے)

عظمٰی بخاری نے کہا کہ مریم نواز کی حکومت کو ابھی دو سال بھی مکمل نہیں ہوئے مگر کارکردگی سب کے سامنے ہے۔ ''آجائیں، کارکردگی کا مقابلہ کرتے ہیں۔ مناظرے کے لیے میں تیار ہوں، قوم کے سامنے سب کچھ واضح ہو جائے گا۔ انہوں نے کہا کہ سندھ میں 17 سالہ حکومت کے باوجود وہاں عوامی فلاح کے وہ منصوبے نظر نہیں آتے جو پنجاب میں ڈیڑھ سال میں مکمل ہوئے ہیں۔

یہی تو ہمارا مؤقف ہے کہ سندھ میں ترقی ہو رہی ہے تو نظر کیوں نہیں آتی؟ شرمیلا فاروقی آئیں اور قوم کو دکھائیں۔ عظمٰی بخاری نے کہا کہ کراچی کے عوام بھی لاہور کی سڑکوں اور صفائی کی تعریف کرتے ہیں جس پر پیپلز پارٹی کے رہنماؤں کو پریشانی ہوتی ہے۔ انہوں نے مزید کہا کہ مریم نواز پنجاب کے سیلاب متاثرین کو 10 لاکھ روپے کے امدادی چیک دینے جا رہی ہیں، جبکہ پیپلز پارٹی چاہتی ہے کہ بی آئی ایس پی کے ذریعے زبردستی پنجاب میں صرف 10 ہزار روپے کے امداد پر اکتفا کیا جائے۔ ہمیں کوئی اعتراض نہیں کہ آپ سندھ کے متاثرین کو بی آئی ایس پی کے ذریعے امداد دیں، لیکن پنجاب میں مریم نواز متاثرین کو زیادہ اور براہِ راست سہولت دے رہی ہیں۔