پولش کوہ پیما کا عالمی کارنامہ، بغیر آکسیجن مانٹ ایورسٹ سے اسکی ڈائون،تاریخ میں پہلا اعزاز اپنے نام کر لیا

جمعرات 2 اکتوبر 2025 19:29

ڈبلن(اُردو پوائنٹ اخبارتازہ ترین - این این آئی۔ 02 اکتوبر2025ء)پولینڈ کے کوہ پیما انڈریج بارگیل نے ایک تاریخی کارنامہ سرانجام دیتے ہوئے دنیا کے بلند ترین پہاڑ مانٹ ایورسٹ (8849میٹر)سے بغیر آکسیجن سلینڈر کے اسکی ڈائون کر کے تاریخ میں پہلا اعزاز اپنے نام کر لیا۔37 سالہ بارگیل اس سے قبل 2018 میں دنیا کی دوسری بلند ترین چوٹی کے ٹو سے پہلی مرتبہ اسکی ڈان کرنے والے ایڈونچرر بھی رہ چکے ہیں۔

میڈیا رپورٹ کے مطابق بارگیل نے 16 گھنٹے ڈیتھ زون (8 ہزار میٹر سے بلند علاقہ)میں انتہائی سخت حالات کا مقابلہ کیا، چوٹی پر صرف چند منٹ گزارنے کے بعد انہوں نے فوری طور پر اپنی اسکی باندھی اور ڈھلوان پر اترنا شروع کیا تاکہ سورج غروب ہونے سے قبل سفر مکمل کیا جا سکے۔

(جاری ہے)

انسٹاگرام پر شیئر کی گئی ویڈیو میں بارگیل کو برفانی ڈھلوان پر تیز رفتاری سے اترتے اور ہمالیہ کے فلک بوس پہاڑوں کے درمیان اپنی راہ بناتے دیکھا جا سکتا ہے،ان کی ٹیم کے مطابق یہ ڈسینٹ ایک ہی بار میں مکمل نہیں ہوا، اندھیرا چھا جانے پر وہ کیمپ 2 (6400 میٹر) پر رک گئے اور اگلی صبح سورج نکلنے پر اپنا سفر مکمل کیا،پولش کوہ پیمائی کی تاریخ میں یہ ایک اور سنہری باب ہے، جہاں پہلے ہی جیورزی کوکوچکا اور وانڈا رٹکیویچ جیسے عظیم کوہ پیمائوں کے نام روشن ہیں۔