ٹیلنٹ ہنٹ سمر وومن باکسنگ کوچنگ کیمپ اختتام پذیر،تقریب کے آخر میں کھلاڑیوں میں سرٹیفکیٹس اور اسناد بھی تقسیم کی گئیں

جمعرات 2 اکتوبر 2025 20:45

حیدرآباد (اُردو پوائنٹ اخبارتازہ ترین - این این آئی۔ 02 اکتوبر2025ء) محکمہ کھیل سندھ اور سندھ باکسنگ ایسوسی ایشن کے اشتراک سے منعقدہ پہلا سندھ ٹیلنٹ ہنٹ سمر ویمن باکسنگ کوچنگ اینڈ ٹریننگ کیمپ 2025 ایس ایس بی یوتھ ہاسٹل نیاز اسٹیڈیم حیدرآباد میں اختتام پذیر ہوگیا۔تین روزہ کیمپ میں کراچی، حیدرآباد، میرپورخاص، لاڑکانہ سمیت سندھ کے مختلف اضلاع سے 100 سے زائد خواتین باکسرز نے شرکت کی۔

کیمپ کے دوران انٹرنیشنل کوچز اور ٹیکنیکل ماہرین کی نگرانی میں شرکائ کو جدید کوچنگ تکنیک، فٹنس ٹریننگ، دفاعی و حملہ آور مہارتوں اور باکسنگ کی جدید تربیت فراہم کی گئی۔ ہر روز خصوصی ورکشاپس اور پریکٹس سیشنز بھی منعقد ہوئے۔اختتاحی تقریب میں ڈسٹرکٹ اسپورٹس آفیسر حیدرآباد مدام مریم کیریو، صدر سندھ باکسنگ ایسوسی ایشن ایم اصغر بلوچ، سیکریٹری حیدرآباد ڈویڑن اولمپک کمیٹی پرویز احمد شیخ سمیت دیگر اسپورٹس عہدیدار شریک ہوئے اور کھلاڑیوں کے جذبے کو سراہا۔

(جاری ہے)

اختتامی تقریب کے مہمانِ خصوصی صدر سندھ باکسنگ ایسوسی ایشن اصغر بلوچ تھے، جنہوں نے باکسرز کی کارکردگی کو سراہتے ہوئے کہا کہ اس طرح کے پروگرامز خواتین کھلاڑیوں کے لیے کھیلوں میں آگے بڑھنے اور اپنی صلاحیتوں کو منوانے کا بہترین موقع فراہم کرتے ہیں۔تقریب کے آخر میں کھلاڑیوں میں سرٹیفکیٹس اور اسناد بھی تقسیم کی گئیں۔ اس موقع پر حیدرآباد ڈویڑن باکسنگ ایسوسی ایشن کے صدر سردار عطا بلوچ، سیکریٹری محمد سلیم، زرعی یونیورسٹی ٹنڈو جام کے ڈائریکٹر اسپورٹس منظور حسین خانزادہ، باکسر رستم بلوچ، عبدالوحید درویش اور محمد علی تمرانی بھی موجود تھے۔