اقلیتوں کے کردار کو سراہنے اور اظہار یکجہتی کی قرارداد کی سینیٹ سے متفقہ منظوری اقلیتوں کے حقوق کی آئینی ضمانت کو مزید تقویت دیتی ہے، ڈاکٹر جوزف ارشد

جمعرات 2 اکتوبر 2025 19:50

اسلام آباد (اُردو پوائنٹ اخبارتازہ ترین - اے پی پی۔ 02 اکتوبر2025ء) کیتھولک چرچ پاکستان کے سربراہ آرچ بشپ ڈاکٹر جوزف ارشد نے سینیٹ آف پاکستان کی جانب سے اقلیتوں کے کردار کو سراہنے اور ان کے ساتھ اظہار یکجہتی کی قرارداد کی متفقہ منظوری کو خوش آئند قرار دیتے ہوئے کہا ہے کہ یہ قرارداد پاکستان میں موجود اقلیتوں کے حقوق، مساوات اور شمولیت کی آئینی ضمانت کو مزید تقویت دیتی ہے۔

جمعرات کو ’’اے پی پی‘‘ سے گفتگو کرتے ہوئے آرچ بشپ نے کہا کہ قائداعظم محمد علی جناح کا 11 اگست 1947ء کا خطاب ہمارے لئے ہمیشہ رہنمائی کا سرچشمہ ہے جس میں تمام شہریوں کو مذہب، عقیدے یا پس منظر سے بالاتر ہو کر برابر کے حقوق اور آزادیوں کی یقین دہانی کرائی گئی تھی۔انھوں نے کہا کہ پاکستان کے آئین میں اقلیتوں کے بنیادی حقوق واضح ہیں اور یہ قرارداد اس بات کی یاد دہانی ہے کہ اقلیتیں ملک کی ترقی، خوشحالی اور قومی یکجہتی میں ہمیشہ کلیدی کردار ادا کرتی رہی ہیں۔

(جاری ہے)

انھوں نے چیئر مین سینیٹ سید یوسف رضا گیلانی کی جانب سے پاکستان کی سینیٹ میں اقلیتی کاکس قائم کرنے کے اقدام کی ستائش کی جو قومی اسمبلی اور سینیٹ دونوں کی نمائندگی پرمشتمل ایک مشترکہ پارلیمانی فورم ہوگا تا کہ اقلیتوں کے مسائل کو اجتماعی طور پر حل کیا جا سکے اور ان کے حقوق کو فروغ دیا جا سکے۔ آرچ بشپ نے حکومت اور پارلیمنٹ پر زور دیا کہ وہ بین المذاہب ہم آہنگی، رواداری اور شمولیت کو فروغ دینے کے لئے مزید موثر اقدامات کرے اور تعلیمی نصاب میں قائداعظم کا 11 اگست کا خطاب اور اقلیتوں کے حقوق کو شامل کرے تاکہ نئی نسل کو مساوات اور تنوع میں اتحاد کی تعلیم دی جا سکے۔

آخر میں آرچ بشپ ڈاکٹر جوزف ارشد نے اس عزم کا اظہار کیا کہ پاکستان کے مسیحی اور دیگر اقلیتی برادریاں اپنی وفاداری، قربانیوں اور خلوص کے ساتھ ملک کی خدمت اور ایک پرامن، خوشحال و متحد پاکستان کے لئے اپنا کردار ادا کرتی رہیں گی۔