نوشکی صمود فلوٹیلا قافلے پر اسرائیلی حملے و گرفتاریوں کے خلاف زبردست احتجاجی جلوس و مظاہرہ

نوشکی (اُردو پوائنٹ اخبارتازہ ترین - آن لائن۔ 03 اکتوبر2025ء) جمعیت علمائے اسلام ضلع نوشکی کے زیر اہتمام جمعیت کے سربراہ مولانا فضل الرحمان کے حکم پر فلسطینی مظلوم مسلمانوں کی مدد و نصرت کیلئے جانے والے صمود فلوٹیلا کے قافلے پر اسرائیلی حملے و گرفتاری، اسرائیلی غنڈہ گردی و قتل و غارتگری کے خلاف و مظلوم فلسطینیوں سے اظہار ہمدردی کی خاطر زبردست احتجاجی جلوس نکالا گیا اور میر گل خان نصیر چوک پر بھرپور مظاہرہ کیا گیا ،احتجاجی جلوس و مظاہرے کی صدارت جمعیت علمائے اسلام کے ضلعی نائب امیر مولانا غلام حیدر نے کی ،مظاہرے سے جمعیت علمائے اسلام کے صوبائی ڈپٹی جنرل سیکریٹری حاجی منظور احمد مینگل ، جمعیت علمائے اسلام تحصیل نوشکی کے امیر مولانا عبد الغفار ، جمعیت علمائے اسلام کے ضلعی ترجمان حافظ عبداللہ گورگیج اور جمعیت میڈیا سیل کے کوآرڈینیٹر محمد زکریا عادل نے خطاب کرتے ہوئے کہا کہ ہم اسرائیل کی ننگی جارحیت اور صمود فلوٹیلا پر حملے و گرفتاریوں کی بھرپور مذمت کرتے ہیں اور مظلوم فلسطینی مسلمانوں سے اظہار یکجہتی بھی کرتے ہیں ،صمود فلوٹیلا میں شریک افراد انسانیت کے محسن ہیں اور مجاہد ہیں جو گرفتار ہوئے ہیں انکی رہائی کیلئے پاکستان سمیت پوری دنیا آواز اٹھائے ،انہوں نے کہا اسرائیل غنڈہ گردی ، بدمعاشی اور قتل و غارتگری کی تمام حدیں پار کرچکی ہے اور مظلوم فلسطینیوں کو بے دریغ تہہ تیغ کررہی ہے امریکہ جیسے استعمار انکی مکمل پشت پناہی کررہی ہے انہیں ہر طرح کا سپورٹ کررہا ہے اور بیس نکاتی ایجنڈا کے تحت فلسطینیوں کو اپنی سر زمین سے بے دخل کرنے کی کوشش کررہی ہے،جبکہ دوسری جانب غزہ کے مسلمان بیت المقدس کی آزادی کیلئے اپنی جان مال کی قربانیاں دے رہے ہیں گھر بار انکے تباہ ہورہے معصوم بچے بھوک اور پیاس سے تڑپ تڑپ کر جان دے رہے ہیں ،مگر ہمارے بے حس اور غافل حکمران اپنی حکومتوں کو بچانے اور اپنا بینک بیلنس بنانے میں مصروف ہیں بلکہ بہت سارے مسلم ممالک اسرائیل کی کمک و مدد کررہے بے جو بے غیرتی کی انتہا ہے، غیر مسلم آج دنیا بھر میں احتجاج کررہے ہیں مگر مسلمان خاموش ہیں چپ ہیں اور اپنے کاروبار زندگی میں مصروف ہیں ،انہوں نے کہا ایک بھی حضرت عمر فاروق جیسا حکمران نہیں کہ بیت المقدس کو آزاد کرے اور مظلوم فلسطینی مسلمانوں کو اسرائیلی ظلم و ستم سے نجات دے ، مگر سلام ہے فلسطین کے ان غیرت مند مسلمانوں کو جو کٹ مر رہے ہیں مگر اپنے ایمان، بیت المقدس اور فلسطینی زمین پر سمجھوتا نہیں کررہے ،مقررین نے اپنے خطاب میں نوشکی عوام و تاجر برادری سے اپیل کی کہ وہ غیرت ایمانی کا ثبوت دیتے ہوئے اسرائیلی مصنوعات اور ملٹی نیشنل کمپنیوں کی فروخت کردہ اشیا کا مکمل بائیکاٹ کریں اور انکی متبادل اشیا استعمال کریں تاکہ ہمارے پیسوں سے فلسطینی مسلمان قتل ہونے سے بچ جائیں اگر آج ہم نے فلسطینیوں کیلئے آواز نہیں اٹھائی تو کل کو اللہ تعالی کو جواب دہ ہونگے اور بحیثیت مسلمان ہمارا فرض بنتا ہے کہ اپنے غزہ کے آواز بلند کریں ۔