بچوں کو پولیو ویکسین نہ پلانے پر والدین کی سمز بند اور شناختی کارڈ بلاک کرنے کی تجویز

کراچی ( اُردو پوائنٹ اخبارتازہ ترین۔ 04 اکتوبر 2025ء ) بچوں کو پولیو ویکسین نہ پلانے پر والدین کی سمز بند اور شناختی کارڈ بلاک کرنے کی تجویز دے دی گئی، وزیراعلیٰ ہاؤس سندھ میں پولیو ویکسین انکار سیل قائم کرنے کا حکم ددے دیا گیا۔ وزیراعلیٰ سندھ مراد علی شاہ کی زیر صدارت وزیراعلیٰ ہاؤس میں پولیو کے خاتمے سے متعلق اجلاس ہوا جہاں انہوں نے کہا کہ میرے پاس کوئی دوسرا راستہ نہیں بچا، سوائے اس کے کہ ان لوگوں کو سزا دوں جو پولیو کے خاتمے کی اپنی قومی ذمہ داری ادا نہیں کرتے، یہ ذمے داری گھر سے شروع ہوتی ہے اور پورے صوبے اور ملک کو متاثر کرتی ہے، اسی لیے اب ایسے والدین کے خلاف سخت اقدامات کیے جائیں گے جو اپنے بچوں کو پولیو کے قطرے پلانے سے انکار کرتے ہیں، ان میں ان کے موبائل فون کی سمز بند کرنا، قومی شناختی کارڈ اور پاسپورٹ معطل کرنا بھی شامل ہے، چیف سیکریٹری موبائل سمز، شناختی کارڈز اور پاسپورٹس بلاک کرنے کا منصوبہ پیش کریں۔

(جاری ہے)

وزیرِ اعلیٰ سندھ کے میڈیا کنسلٹنٹ عبدالرشید چنا نے بتایا کہ وزیرِ اعلیٰ سندھ مراد علی شاہ نے صوبائی محکمۂ صحت کو ہدایت کی کہ وہ یونین کونسل کی سطح پر انکار کرنے والے والدین کی تفصیلات فراہم کرے تاکہ ان سے سماجی، سیاسی اور انتظامی سطح پر نمٹا جا سکے اور ایسے گھروں میں پولیو کے قطرے لازمی طور پر پلائے جائیں، ہر مہم کے بعد فوری طور پر انکار کے معاملات کو حل کرتے ہوئے والدین کو بچوں کو پولیو ویکسین دینے کیلئے قائل کیا جائے گا۔

بتایا گیا ہے کہ صوبہ سندھ میں پولیو کے 9 کیسز رپورٹ ہو چکے ہیں جو ملک بھر میں رپورٹ ہونے والے 29 کیسز میں شامل ہیںان میں سے خیبر پختونخواہ میں 18 کیسز اور پنجاب و آزاد جموں و کشمیر میں 1، 1 کیس رپورٹ ہوا، سندھ کے نئے کیسز میں ٹھٹہ اور بدین سے 2 ، مٹھی، عمرکوٹ، حیدرآباد، قمبر اور لاڑکانہ سے 1، 1 کیس رپورٹ ہوا، کراچی کے علاقہ ملیر میں خاص طور پر والدین کی جانب سے بچوں کو پولیو سے بچاؤ کی ویکسین پلانے سے انکار کیا گیا۔

وزیر ِاعلیٰ سندھ مراد علی شاہ نے ہدایت کی ہے کہ 13 اکتوبر سے شروع ہونے والی پولیو مہم کو جنگی حکمتِ عملی کے ساتھ چلایا جائے، کسی بھی قسم کی غفلت برداشت نہیں کی جائے گی، جو افسر کارکردگی نہیں دکھائے گا وہ میری ٹیم کا حصہ نہیں رہے گا، میں پہلے ہی محکمۂ صحت اور انتظامیہ کے کچھ افسران کو ہٹا چکا ہوں، اگر لاپروائی برتی گئی تومزید بھی ہٹائے جائیں گے۔