گلگت بلتستان اور مانسہرہ کے سیاحتی علاقوں میں موسم کی پہلی برف باری، دلکش نظارے

برف باری کے ساتھ سردی میں بھی اضافہ، علاقے کا منظر خوبصورت اور برف سے ڈھک گیا

ہفتہ 4 اکتوبر 2025 22:05

گلگت /مانسہرہ (اُردو پوائنٹ اخبارتازہ ترین - این این آئی۔ 04 اکتوبر2025ء)گلگت بلتستان اور مانسہرہ کے سیاحتی علاقوں میں موسم کی پہلی برف باری شروع ہوگئی ہے جس سے علاقے کا منظر خوبصورت اور برف سے ڈھک گیا ، برف باری کے ساتھ ساتھ سردی میں اضافہ ہوگیا ہے جس سے مقامی باشندوں اور سیاحوں کو شدید سردی کا سامنا ہے۔

(جاری ہے)

تفصیلات کے مطابق گلگت بلتستان کے بلند پہاڑوں پر موسم کی پہلی برف باری نے علاقے کو سفید چادر میں ڈھانپ لیا،برف باری کا آغاز گلگت کے قریب ساڑھے چار ہزار میٹر کی بلندی سے ہوا اور اس کا اثر خنجراب، بابوسر اور برزول ٹاپ جیسے دور دراز علاقوں تک پھیل چکا ہے، برف باری کی وجہ سے بالائی علاقوں میں شدید سردی کا سامنا ہے۔

تیز آندھی کے ساتھ ہلکی بارش بھی ہوئی ہے جس سے موسم مزید سرد اور برفیلا ہو گیا ہے، سیاحوں اور مقامی لوگوں کے لئے سردی سے بچاؤ کے انتظامات شروع کر دیئے گئے ۔دوسری جانب مانسہرہ کے سیاحتی مقامات جیسے بابو سر ٹاپ، بیسر اور نوری ٹاپ پر بھی برف باری کا آغاز ہو چکا ہے، بابو سر ٹاپ پر ہلکی برف باری سے علاقے کا منظر دلکش ہوگیا ہے اور سیاحوں کی بڑی تعداد نے ان سیاحتی مقامات کا رخ کیا ہے۔