صنم کی بہن فلک جاوید کا چار روزہ جسمانی ریمانڈ منظور، گزشتہ سماعت کا تحریری فیصلہ جاری

پیر 6 اکتوبر 2025 15:32

لاہور (اُردو پوائنٹ اخبارتازہ ترین - این این آئی۔ 06 اکتوبر2025ء) ریاست مخالف ٹویٹ سمیت دو مقدمات میں گرفتار فلک جاوید کا چار روزہ جسمانی ریمانڈ منظور کر لیا گیا۔ضلع کچہری لاہور میں جوڈیشل مجسٹریٹ نعیم وٹو نے گزشتہ سماعت کا تحریری فیصلہ جاری کر دیا، این سی سی آئی اے کے تفتیشی افسر نے 21روز کا جسمانی ریمانڈ مانگا تھا۔

(جاری ہے)

تحریری فیصلے کے مطابق تفتیشی افسر نے ملزمہ کا موبائل ریکور کر لیا، ملزمہ تفتیشی افسر کو موبائل فون کا پاسورڈ نہیں دے رہی جس پر عدالت ملزمہ کا چار روزہ جسمانی ریمانڈ منظور کرتی ہے۔

عدالت نے حکم دیا کہ ملزمہ کو 8اکتوبر کو دوبارہ عدالت کے روبرو پیش کیا جائے، مزید ریمانڈ چاہئے ہو تو تفتیشی افسر کی رپورٹ دیکھ کر عدالت فیصلہ کرے گی۔تحریری فیصلے میں درج ہے کہ اگر تفتیشی افسر نے ملزمہ سے مواد برآمدگی کی مزید رپورٹ پیش نہ کی تو ملزمہ کا ریمانڈ نہیں دیا جائے گا، تفتیشی افسر جیل میں جا کر ملزمہ سے تفتیش کریں گے۔