آوارہ کتوں کی تلفی کیس، لاہور ہائیکورٹ نے فائل چیف جسٹس کو بھجوادی

بدھ 8 اکتوبر 2025 19:11

لاہور (اُردو پوائنٹ اخبارتازہ ترین - آن لائن۔ 08 اکتوبر2025ء) لاہور ہائیکورٹ میں آوارہ کتوں کی تلفی سے متعلق درخواست پر سماعت ہوئی۔ جسٹس فیصل زمان خان نے کیس جسٹس مزمل اختر شبیر کی عدالت بھجوانے کی سفارش کرتے ہوئے فائل چیف جسٹس لاہور ہائیکورٹ کو ارسال کر دی۔ دورانِ سماعت، جسٹس فیصل زمان خان نے ریمارکس دیے کہ اسی نوعیت کی ایک درخواست پر پہلے ہی جسٹس مزمل اختر شبیر سماعت کر رہے ہیں، لہٰذا بہتر ہوگا کہ دونوں درخواستوں کو یکجا سنا جائے۔

(جاری ہے)

یہ درخواست ینگ ڈاکٹرز ایسوسی ایشن کی جانب سے دائر کی گئی تھی، جس میں مؤقف اختیار کیا گیا کہ آوارہ کتوں کی بڑھتی ہوئی تعداد شہریوں کے لیے سنگین خطرہ بن چکی ہے، لیکن پنجاب حکومت نے اب تک ان کی تلفی سے متعلق کوئی واضح پالیسی مرتب نہیں کی۔ درخواست میں کہا گیا کہ شہری روزانہ درجنوں کتوں کے حملوں کا نشانہ بن رہے ہیں جبکہ متعلقہ ادارے خاموش تماشائی بنے ہوئے ہیں۔درخواست میں پنجاب حکومت، سیکرٹری ہیلتھ، سیکرٹری لوکل گورنمنٹ اور دیگر اداروں کو فریق بنایا گیا ہے۔ عدالت نے سماعت مکمل کرتے ہوئے فائل چیف جسٹس کو بھجوا دی تاکہ درخواستوں کو یکجا کر کے آئندہ کارروائی کی جا سکے۔