بھارت کے ہسپتال میں خوفناک آتشزدگی، 6مریض ہلاک ،متعدد زخمی

پیر 6 اکتوبر 2025 21:05

نئی دہلی (اُردو پوائنٹ اخبارتازہ ترین - این این آئی۔ 06 اکتوبر2025ء) بھارتی ریاست راجستھان کے بڑے ہسپتال مان سنگھ کے ٹراما سینٹر میں خوفناک آتشزدگی سے 2خواتین سمیت 6مریض ہلاک ہوگئے۔بھارتی میڈیا کے مطابق ٹراما سینٹر انچارج ڈاکٹر انوراگ دھاکڑ نے بتایا کہ آگ نیورو آئی سی یو کے سٹوریج ایریا میں لگی، جہاں 11مریض زیر علاج تھے،اس دوران قریبی وارڈ میں زیر علاج 14مریضوں کو بروقت دوسری جگہ منتقل کیا گیا جس کے باعث ہلاکتوں کی تعداد کم رہی۔

عینی شاہدین کے مطابق آگ لگتے ہی ہسپتال میں افراتفری اور بھگدڑ مچ گئی، دھوئیں کے سیاہ بادل پھیل گئے، عملے اور تیمارداروں نے مریضوں کو بیڈ سمیت باہر نکالنے کی کوشش کی۔ہسپتال متاثرہ شعبے کا ریکارڈ جل کر خاکستر ہوگیا جبکہ خون کے نمونے اور آئی سی یو کے قیمتی آلات بھی شعلوں کی نذر ہوگئے۔

(جاری ہے)

فائر بریگیڈ کا عملہ اطلاع ملتے ہی جائے حادثہ پر پہنچا اور کھڑکیاں توڑ کر ریسکیو شروع کیا۔

دو گھنٹے کی مسلسل جدوجہد کے بعد آگ پر قابو پالیا گیا۔ہلاک مریضوں کے لواحقین نے اسپتال انتظامیہ پر سنگین الزامات عائد کرتے ہوئے کہا کہ انہوں نے عملے کو پہلے ہی دھوئیں کے اخراج کی اطلاع دی تھی لیکن اس پر توجہ نہ دی گئی۔راجستھان کے وزیراعلی بھجن لال شرما، پارلیمانی امور کے وزیر جوگارام پٹیل اور وزیرِ مملکت برائے داخلہ جواہر سنگھ بیدھم نے ہسپتال کا دورہ کیا۔تاہم موقع پر موجود غمزدہ لواحقین نے وزراء کو گھیر کر شدید احتجاج کیا اور اپنے پیاروں کی موت کا ذمہ دار ٹھہرایا۔