سموگ کی روک تھام اور فصلوں کی باقیات کو نہ جلانے کے حوالہ سے خصوصی آگاہی مہم کا آغاز کر دیا گیا ہے،کمشنر گوجرانوالہ ڈویژن

جمعرات 9 اکتوبر 2025 18:42

گوجرانوالہ (اُردو پوائنٹ اخبارتازہ ترین - اے پی پی۔ 09 اکتوبر2025ء) کمشنر گوجرانوالہ ڈویژن سید نوید حیدر شیرازی نے کہا ہے کہ گندم کی زیادہ پیداوار،سموگ کی روک تھام اور فصلوں کی باقیات کو نہ جلانے کے حوالہ سے کسانوں،زمینداروں اور کاشتکاروں میں خصوصی آگاہی مہم کا آغاز کر دیا گیا ہے۔فصلوں کی باقیات کو جلانے سے اٹھنے والا دھواں نہ صرف ماحولیاتی آلودگی اور سموگ کا باعث بنتا ہے بلکہ اس سے لوگ آشوب چشم،الرجی اور سانس کے امراض میں بھی مبتلا ہوتے ہیں اس لیے کسانوں،زمینداروں کو چاہیے کہ اپنی فصلوں کی باقیات کو جلانے سے پرہیز کریں اور جدید طریقہ کاشت اور زرعی مشینری کے زریعے فصلوں کی باقیات کو مٹی میں ملا دیں۔

ان خیالات کا اظہار محکمہ زراعت کے زیر اہتمام انسداد سموگ اورگندم آگاؤ مہم کے سلسلہ میں منعقدہ کسان سیمینار سے خطاب کرتے ہوئے کیا۔

(جاری ہے)

ڈپٹی کمشنر نوید احمد ،اے ڈی سی آر شبیر حسین بٹ،اسسٹنٹ کمشنرز سٹی اقرامبین ،صدر فیصل مجید،ڈپٹی ڈائریکٹر زراعت ڈاکٹر جاوید اختر پڈھیار،پرنسپل ایگریکلچر آفیسر/اسسٹنٹ ڈائریکٹر زراعت توسیع محمد اعظم مغل سمیت محکمہ زراعت کے افسران،کسان اور زمینداروں کی بڑی تعداد سیمینار میں شریک تھے۔

کمشنرسید نوید حیدر شیرازی نے کہا کہ وزیراعلیٰ پنجاب مریم نواز شریف کے سر سبز ویژن کے تحت محکمہ زراعت کی ترقی اور کسانوں کی خوشحالی کے لیے کئی انقلابی پروگرامز شروع کیےگئے،کسان کارڈ،گرین ٹریکٹر سکیم، جدید زرعی آلات کی فراہمی سے جہاں پنجاب میں زراعت ترقی کر رہی ہیں تو وہیں کسانوں،زمینداروں کو چاہیے ان جدید زرعی آلات و مشینری کے بہتر استعمال سے اپنی گندم کی پیداوار میں اضافہ کریں تاکہ ہمارا صوبہ،ملک اور عوام زیادہ سے زیادہ خوشحال ہو سکے۔

ڈپٹی کمشنر نوید احمد نے کسانوں،زمینداروں کو ہدایت کی کہ اپنی فصلوں کی باقیات کو ہر گز نہ جلائیں،فصلوں کی باقیات جلانے سے سموگ اور فضائی آلودگی میں اضافہ ہوتا ہے،کسان اپنی جدید زرعی مشینریہ و آلات کی بدولت فصلوں کی باقیات کو مٹی میں ملائیں تاکہ زمین کی زرخیزی بھی برقرار رہ سکے۔\378